रायपुर, मुख्यमंत्री श्री भूपेश बघेल ह काली संझा राईपुर के कलेक्टोरेट चौक म रायपुर स्मार्ट सिटी लिमिटेड कोति ले नवा बनवाए छत्तीसगढ़ महतारी के प्रतिमा के अनावरण करिन। ये बेरा म उमन कहिन कि छत्तीसगढ़ महतारी हमार राज्य के अस्मिता, सम्मान अऊ स्वाभिमान के चिन्हारी ये। छत्तीसगढ़ के माटी के परंपरा अऊ लोक संस्कृति ल बढ़ावा देहे बर प्रतिमा स्थापित करे गए हे। उमन कहिन कि राज्य सरकार कोति ले सबो जिला मन म छत्तीसगढ़ महतारी के प्रतिमा लगाय के फैसला करे गए हे। उमन कहिन कि हमर सरकार राज्य के पारंपरिक तिहार, खेल, कला अऊ संस्कृति ल बढ़ावा देहे उपर विशेष ध्यान देवत हे।
जानबा हे कि छत्तीसगढ़ महतारी के 11 फुट ऊंच अउ 1200 किलो वजनी के ये कांसा के प्रतिमा ल देश के ख्यातिलब्ध मूर्तिकार भिलाई निवासी पद्मश्री जे.एम. नेल्सन ह सिरिफ एक महिना के भीतर करे हे। ये प्रतिमा स्थल के संरचनात्मक स्वरूप रायपुर के ऑर्किटेक्ट श्री मनीष पिल्लेवार ह तियार करे हे। ये प्रतिमा के निर्माण जिला प्रशासन, रायपुर के मार्गदर्शन म रायपुर स्मार्ट सिटी लिमिटेड अउ नगर निगम रायपुर कोति ले कराए गए हे।
ये बेरा म कृषि मंत्री अउ जिला के प्रभारी मंत्री श्री रविंद्र चौबे, नगरीय प्रशासन मंत्री डॉ. शिवकुमार डहरिया, विधायक अउर छत्तीसगढ़ गृह निर्माण मंडल के अध्यक्ष श्री कुलदीप जुनेजा, महापौर श्री एजाज ढेबर, विधायक श्री सत्यनारायण शर्मा, जनप्रतिनिधिगण, कलेक्टर डॉ. सर्वेश्वर नरेंद्र भुरे, वरिष्ठ पुलिस अधीक्षक श्री प्रशांत कुमार अग्रवाल, स्मार्ट सिटी लिमिटेड रायपुर के एमडी अउ नगर निगम रायपुर आयुक्त श्री मयंक चतुर्वेदी संग संबंधित अधिकारी-कर्मचारी उपस्थित रहिन।
मुख्यमंत्री ह रायपुर के कलेक्टोरेट चौक म छत्तीसगढ़ महतारी के 11 फीट ऊंच कांसा के प्रतिमा के करिन अनावरण
