छत्तीसगढ मनवा कुर्मी छत्रिय समाज के निर्वाचित प्रतिनिधि मन के शपथ समारोह म सामिल होइन राजस्व मंत्री
रायपुर, राजस्व मंत्री श्री टंक राम वर्मा आज ग्राम नरदहा म आयोजित छत्तीसगढ मनवा कुर्मी छत्रिय समाज के निर्वाचित प्रतिनिधि मन के शपथ समारोह म सामिल होइन।
शपथ ग्रहण समारोह म राजस्व मंत्री श्री वर्मा ह कुर्मी समाज के निर्वाचित प्रातिनिधि मन ल बधाई दीन। ए अवसर म उमन कहिन के समाज के नेतृत्वकर्ता सहज अऊ सुलझे होना जरूरी हे। कुर्मी समाज के बहुत अकन निर्णय मन ल आन समाज के प्रबुद्धजन मन ह घलोक स्वीकार करे हें। कुर्मी समाज के निर्णय ले समाज के दशा अऊ दिशा म सुधार होय हे। समाज ल नवा दिशा देखाय अऊ विकास के मार्ग म ले जाय बर संगठन म जागरूकता जरूरी हे।
मनवा कुर्मी क्षत्रिय समाज के केंद्रीय अध्यक्ष श्री खोड़स राम कश्यप ह कहिन के नेतृत्व के प्रति विश्वास, एकता अऊ संगठन समाज ल ऊर्जावान अऊ प्रगतिशील बनाथे। कुर्मी समाज ह बहुत अकन कुरीति मन म प्रतिबंध लगाके विकसित समाज बर मिसाल प्रस्तुत करे हे। समाज म व्याप्त अइसन विचार अऊ परम्परा जेन समाज के प्रगति म बाधा बनही, ओ म सर्वसम्मति ले प्रतिबंध लगाए जाही।
समारोह म नवनिर्वाचित राज प्रधान मन म धरसींवा राज ले श्री नीलमणि परगनिहा, धमधा राज ले श्रीमती सत्यभामा परगनिहा, पलारी राज ले श्री रामखिलावन, बलौदाबाजार राज ले श्रीमती सुनीता वर्मा, तिल्दा राज ले श्री ठाकुर राम वर्मा, रायपुर राज ले श्री जागेश्वर वर्मा अऊ दुर्ग राज ले श्री ईश्वरी वर्मा ह शपथ ग्रहण करिस। ए अवसर म निर्वाचन समिति के सदस्य मन ल अभिनंदन पत्र ले सम्मानित करे गीस।
