मुख्यमंत्री श्री बघेल छत्तीसगढ़ मनवा कुर्मी क्षत्रिय समाज के राज अधिवेशन म संघरिन

रायपुर, मुख्यमंत्री श्री भूपेश बघेल ह कहिन कि संगठित समाज ही विकास के धारा म आगू बढ़थे। उमन कहिन कि समाज के विकास म सबके भागीदारी जरूरी हे। सबो के एक होए ले समाज म सामाजिक समरसता के विकास होही। ओ मन काली रायपुर जिला के तिल्दा विकासखण्ड के ग्राम छतौद म आयोजित छत्तीसगढ़ मनवा कुर्मी क्षत्रिय समाज के 76वां वार्षिक राज अधिवेशन ल सम्बोधित करत रहिन। मुख्यमंत्री ह ये बेरा म नेवरा म कुर्मी छात्रावास म अकतहा कुरिया बनवाए बर 20 लाख रुपिया अऊ तुलसी गाँव म मनवा कुर्मी समाज ल आबंटित जमीन म सामाजिक भवन बर 20 लाख रुपिया के मंजूरी दीन अऊ समाज के 38 प्रतिभावान लइका मन ल सम्मानित करिन। श्री बघेल के छतौद पहुंचे म तिल्दा राज इकाई प्रधान श्री ठाकुर राम वर्मा के अगुवाई म समाज के प्रतिनिधि मन अऊ स्व-जन मन ह उंखर आत्मीय स्वागत करिन।
ये बेरा म छत्तीसगढ़ मनवा कुर्मी क्षत्रिय समाज के केंद्रीय अध्यक्ष श्री चोवा राम वर्मा, लोकसभा क्षेत्र दुर्ग के सांसद श्री विजय बघेल, पूर्व केंद्रीय अध्यक्ष श्री सीताराम वर्मा, राज्यसभा सांसद श्रीमती छइंहा वर्मा,पूर्व विधायक श्री जनकराम वर्मा, श्रीमती लक्ष्मी वर्मा,रायपुर जिला पंचायत के अध्यक्ष श्रीमती डोमेश्वरी वर्मा, जिला पंचायत उपाध्यक्ष श्री टंक राम वर्मा, तिल्दा जनपद पंचायत अध्यक्ष श्रीमती सुमन नायक, धरसींवा जनपद पंचायत अध्यक्ष श्री चंद्रकांत वर्मा, तिल्दा के जनपद सदस्य श्रीमती स्वाति वर्मा संग छतौद के सरपंच श्रीमति कविता वर्मा अऊ बड़ संख्या म मनवा कुर्मी समाज के मनखे मौजूद रहिन।