- वाशरी मन म स्वीकृत क्षमता ले पौने सात लाख टन जादा कोयला पाये गीस
- दीपका खदान संग चाकाबुड़ा अऊ रतिजा के कोल वाशरी मन के तौल कांटा घलोक सील होइन
- 57 वाहन जप्त करके पुलिस सुरक्षा म सौंपे गीस
कोरबा, काली सनिवार के भिनसरहा ले खदान मन अऊ कोल वाशरी मन के राज्य स्तरीय केंद्रीय उड़नदस्ता अऊ जिला प्रशासन के टीम कोति ले शुरू होए जांच देर रात तक चलत रहिस। अधिकारी मन ह खदान अऊ कोल वाशरी मन के गहन जांच करके बड़का कार्यवाही करे हें। जांच करे गे वाशरी मन म स्वीकृत भण्डारण क्षमता ले करीबन पौने सात लाख टन जादा कोयला पाये गए हे। जऊन म वाशरी मन ल नोटिस जारी करके तीन दिन म जवाब मांगे गए हे। राज्य स्तरीय केंद्रीय उड़नदस्ता के अधिकारी मन ह बताइस कि विधिमान्य जवाब नइ मिले म खनिज अधिनियम अऊ भण्डारण नियम मन के तहत विधि सम्मत कड़क कार्यवाही करे जाही।
जांच दल ह एसईसीएल कोति ले संचालित दीपका खदान के तौल कांटा नंबर 16 म अनाधिकृत कर्मचारी कोति ले वाहन मन ल ट्रांजिट पास जारी करत पकड़े गीस अऊ सबो ट्रांजिट पास मन ल जप्त करत तौल कांटा घर ल सील कर देहे गीस। संयुक्त जांच दल ह कनबेरी स्थित स्वास्तिक पावर एण्ड मिनरल लिमिटेड कोल वाशरी म सत्रा हजार टन धुले अऊ रिजेक्टेड कोयला पाइस। वाशरी कोति ले कोयला के वैद्यता के संबंध म उचित कागद प्रस्तुत नइ करे जाय म जांच दल ह वाशरी ल सील कर देहे हे। उड़न दस्ता के ए टीम म खनिज विभाग के 12, राजस्व विभाग के 17, पर्यावरण संरक्षण विभाग के 06 अधिकारी मन संग औद्योगिक स्वास्थ्य अऊ सुरक्षा ले जुड़े अधिकारी अऊ 100 ले जादा पुलिस अधिकारी अऊ जवान सामिल रहिन। जांच दल कोति ले खदान मन अऊ कोल वाशरी मन म पर्यावरण मानक मन के पालन, जल उपयोगिता अऊ दूषित जल प्रबंधन, खनिज नियम मन के पालन के संगें-संग भण्डारण नियम मन अऊ मोटर व्हीकल एक्ट के परिपेक्ष्य म सघन जांच करे गए हे।
खनिज विभाग अऊ परिवहन विभाग के संघरा दल मन ह कल कोल परिवहन म लगे 57 वाहन मन उपर जप्ती के कार्यवाही करके पुलिस सुरक्षा म सौंप दीन। एमां ले 18 खाली वाहन मन म वैद्य कागद नइ रहिस अऊ 39 वाहन म वैद्य ट्रांजिट पास नइ होए के बाद घलव घलोक कोयला ढोए म लगे रहिस। भरे वाहन मन म करीबन एक हजार टन कोयला ल घलोक जप्त करे गए हे। उड़नदस्ता ह चाकाबुड़ा स्थित एसीबी कोल वाशरी अऊ रतिजा स्थित स्पेक्ट्रम कोल वाशरी के तौल कांटा घर ल घलोक सील कर देहे हे। उड़नदस्ता ह स्पेक्ट्रम कोल वाशरी, एसीबी गेवरा वाशरी अऊ एसीबी चाकाबुड़ा वाशरी मन म स्वीकृत भण्डारण क्षमता ले छै लाख 84 हजार टन जादा कोयला भण्डारित होना पाए हे अऊ एखर बर वाशरी मन ल नोटिस जारी कर तीन दिन म जवाब मांगे गए हे।
राज्य स्तरीय केंद्रीय उड़नदस्ता दल ह धतुरा स्थित केजेएसएल कोल वाशरी के जांच के बेरा म कच्चा कोयले के करीबन 32 हजार टन अउ धुले कोयला के करीबन 30 टन स्टाक मौका म पाइस। वाशरी से ए कोल के संबंध म कोनो वैद्य अभिलेख जांच दल के समक्ष प्रस्तुत नइ करे जा सकीस। जांच दल के अधिकारी मन ह ए कोयला के वैद्यता के बारे म कागद 18 जून तक कलेक्टर के आघू प्रस्तुत करे के निर्देश वाशरी के अधिकारी मन ल दिए हें। रतिजा के मारूति वाशरी म बिना ट्रांजिट पास के आठ हाईवा गाड़ी मन ल कोयला के परिवहन करत जांच दल ह पकडि़स अऊ जप्त करके पुलिस सुरक्षा म सौंप दीस।
स्पेक्ट्रम कोल वाशरी रतिजा म स्वीकृत भंडारण क्षमता ले जादा कोयला के भण्डारण करे जाना जांच म सामने आअस। वाशरी के तौल कांटा ल जांच दल ह सील कर देहे हे। वाशरी कोति ले मई महिना के मासिक पत्रक प्रस्तुत नइ करे, रेलवे साईडिंग तक बिना ट्रांजिट पास के कोल परिवहन करे, लिंकेज अऊ रिजेक्ट कोल के उपयोग के अनुमति के वाजिब कागद पेश नइ करे जाय म स्पेक्ट्रम कोल वाशरी ल नोटिस जारी कर तीन दिन म जवाब मांगे गए हे। स्पेक्ट्रम कोल वाशरी कोति ले लीलागर नदी के प्रवाह ल बाधित करके अनाधिकृत रूप ले पानी के उपयोग करे अऊ नदी म बने एनीकट के पहिली अवैध रूप ले सड़क निर्माण करके कोयला परिवहन ल घलोक जांच दल ह पकड़े हे। राज्य स्तरीय केंद्रीय उड़नदस्ता दल ह रेंकी स्थित एसव्ही पावर एण्ड कोल वाशरी म पाछू ढाई बछर ले वाशरी के काम बंद होना पाए हे। पावर प्लांट म सुरक्षा के बहुत उपाय नइ होए, पर्यावरण संरक्षण बर पानी के छिड़काव नइ करे अऊ बहुत मात्रा म वृक्षारोपण नइ होना घलोक पाए गीस हे। पावर प्लांट म अग्निशमन वाहन अऊ पानी के टेंकर घलोक नइ रहिस। पर्यावरण संरक्षण विभाग कोति ले पावर प्लांट ल नोटिस जारी करे गए हे।
राज्य स्तरीय केंद्रीय उड़नदस्ता ह एसीबी के चाकाबुड़ा स्थित वाशरी म रेलवे साईडिंग म कोयला परिवहन बर ट्रांजिट पास जारी नइ करे म तौल कांटा घर ल सील कर दीस, अइसनहे वाशरी म बिना ट्रांजिट पास के चार हाईवा गाड़ी मन ल अवैद्य कोयला के परिवहन करत जांच दल ह पकडि़स अऊ जप्त कर पुलिस सुरक्षा म सौंपिस। एसीबी कोल वाशरी दीपका अऊ गेवरा म उड़नदस्ता ह स्वीकृत भण्डारण क्षमता ले एक लाख टन जादा स्टाक पाये जाय म तीन दिन के भीतर जवाब मांगे हे। गेवरा के वाशरी म जांच के समय कोयला भण्डारण बर स्वीकृत रकबा ले जादा जमीन म कोयला रखना घलोक उड़नदस्ता ह अपन जांच म पाइस। गेवरा वाशरी म उड़नदस्ता ह एक मई ले 15 जून तक कोयला के आवक-जावक रजिस्टर ल जांच बर जप्त कर लेहे हे।
एसीबी के बिंझरी कोल वाशरी म निरधारित प्रारूप म अभिलेख मन के संधारण नइ होत हे। जमनीपाली के इण्डस उद्योग अऊ इन्फ्रास्ट्रेक्चर लिमिटेड म राज्य स्तरीय केंद्रीय उड़नदस्ता दल के दबिश होइस। कंपनी म कोल वाशरी बंद मिलीस। इण्डस उद्योग अऊ इन्फ्रास्ट्रेक्चर लिमिटेड ल संस्थान के रेलवे साईडिंग अऊ वाशरी क्षेत्र म भण्डारित कोयला के ट्रांजिट पास, रेलवे ले डिस्पेच कर आरआर के कापी, क्लोजिंग बैलेंस, स्टाक रजिस्टर, वाशरी उद्योग के पंजीयन आदि सबो जानकारी तीन दिन के भीतर कलेक्टर के आगू प्रस्तुत करे के निर्देश जांच अधिकारी मन ह लिखित नोटिस म दीन।
राज्य स्तरीय केंद्रीय उड़नदस्ता ह दीपका खदान के तौल कांटा घर, चाकाबुड़ा, रतिजा कोल वाशरी मन के दो वे-ब्रिज अऊ कनबेरी के स्वास्तिक मिनरल एण्ड पावर रिर्सोस वाशरी ल सील करे के कार्यवाही करे हें। सील हो जाय ले अब आगामी आदेश तक ए वाशरी अऊ ए सबो सील्ड तौल कांटा घर मन ले कोयला के डिस्पेच नइ होवय।
