आरंग, बाराडेरा, चंदखुरी, खरोरा, तिल्दा म बैठक लेके मतदान बर करे गीस जागरूक
रायपुर, देव लहरी के रिपोर्टिंग. छत्तीसगढ़ मेहर समाज म प्रदेश पदाधिकारी मन के चुनाव 8 सितंबर के दिन होना हे, जेखर बर तीनों संभाग म तैयारी चलत हे। युवा प्रदेश अध्यक्ष तुलसी दौड़िया ह अपन टीम के संग आरंग, बाराडेरा, चंदखुरी, खरोरा, तिल्दा व आन जगा दौरा करके सदस्यता अभियान चलावत हे अऊ बैठक लेके मतदान बर समाज के मनखे मन ल जागरूक करत हे। बाराडेरा क्षेत्रीय समिति अध्यक्ष तानसिंह गजेन्द्र ह बताइस के हमला चुनाव संबंधी सामान मिल गए हे, हमार क्षेत्रीय समिति म कुल 38 गांव आथे। हम लउहे सबो गांव म पहुंच के समाज के मनखे मन ल सदस्यता अउ मतदान बर जानकारी देबोन।
हम आप ल बता देवन के मेहर समाज म प्रदेश अध्यक्ष, महासचिव अउ कोषाध्यक्ष बर एक संग रायपुर, बिलासपुर अऊ दुर्ग-भिलाई संभाग म मतदान होना हे। जेखर परिणाम चुनाव के दिन संझा तक घोषित करे जाही। जिंकर सदस्यता फार्म जमा होही ओही मतदान कर सकत हे। ये बेरा म रायपुर सदस्यता प्रभारी रानी बघेल, रविन्द्र लक्ष्मी मेहर, प्रदीप मेहर, सालिक गजेन्द्र, नरेन्द्र कोटराने, चम्पा लहरी, हेमन्त कोटराने के संग समिति के सदस्य मौजूद रहिन।
