- अब तक 8 करोड़ मूल्य के 25 हजार 249 कुंटल मिलेट फसल के होए हे खरीदी
- कोदो, कुटकी अऊ रागी के खरीदी 15 फरवरी तक
रायपुर, छत्तीसगढ़ म कोदो, कुटकी अऊ रागी के समर्थन मूल्य म खरीदी सुव्यवस्थित ढंग ले जारी हे। अब तक करीबन 8 करोड़ रूपिया मूल्य के 25 हजार 249 कुंटल कोदो, कुटकी अऊ रागी के खरीदी हो गे हे। एमां 22 हजार 106 कुंटल कोदो, 01 हजार 361 कुंटल कुटकी अऊ 01 हजार 782 कुंटल रागी के खरीदी होए हे।
राज्य के वन क्षेत्र मन म निवासरत वनवासी मन के परम्परागत कोदो, कुटकी अऊ रागी जइसे मिलेट फसल के खेती ल बढ़ावा देहे बर मुख्यमंत्री श्री भूपेश बघेल के सरकार ह समर्थन मूल्य म खरीदी करे के निर्णय लेहे हे।
वन अउ जलवायु बदलाव मंत्री श्री मोहम्मद अकबर के बताती राज्य म अब एक दिसम्बर 2021 ले 15 फरवरी 2022 तक ये खरीदी अभियान चलही। एमा वनवासी-किसान मन ले कोदो अऊ कुटकी के समर्थन मूल्य मने 30 रूपिया प्रति किलोग्राम अऊ रागी के समर्थन मूल्य 33.77 रूपिया प्रति किलोग्राम निरधारित करे गए हे।
ये संबंध म प्रमुख सचिव वन अउ जलवायु बदलाव श्री मनोज पिंगुआ ह बताइस के इंकर खरीदी के काम अभी हाल म राज्य के जम्मो प्राथमिक लघु वनोपज सहकारी समिति मन के माध्यम ले होवत हे। प्रबंध संचालक राज्य लघु वनोपज संघ श्री संजय शुक्ला ह बताइस कि छत्तीसगढ़ म समर्थन मूल्य म कोदो, कुटकी अऊ रागी फसल मन के खरीदी बर समयावधि 15 फरवरी 2022 तक बढ़ा देहे गए हे। एखर पहिली ए फसल मन के खरीदी बर 31 जनवरी तक के तारीक निरधारित रहिस। जानबा हे कि राज्य के कई क्षेत्र मन म वर्षा होए के सेती मिंजाई म होए देरी के फलस्वरूप किसान मन के हित म ये महत्वपूर्ण निर्णय लेहे गए हे।