मुख्यमंत्री श्री बघेल ले अखिल भारतीय कुर्मी महासभा के प्रतिनिधि मंडल ह करिस सौजन्य मुलाकात
रायपुर, मुख्यमंत्री श्री भूपेश बघेल ले काली संझा राजधानी रायपुर स्थित ऊंखर निवास कार्यालय म अखिल भारतीय कुर्मी महासभा के प्रतिनिधि मंडल ह सौजन्य मुलाकात करिस। जानबा हे कि राजधानी रायपुर के अग्रसेन धाम म 10 ले 12 अगस्त तक अखिल भारतीय कुर्मी समाज अऊ मतदाता जागृति मंच के तत्वावधान म महासभा के आयोजन करे गए रहिस। महासभा म देश के कई राज्य ले कुर्मी समाज के प्रतिनिधि सामिल होए रहिन।
मुख्यमंत्री श्री बघेल ह ये बेरा म संबोधित करत कहिन कि छत्तीसगढ़ के पूर्ण विकास बर हर समाज अऊ वर्ग के मनखे मन के उत्थान बर सरलग काम होवत हे। एमां नवाचार के परयोग करत अइसन जनकल्याणकारी कार्यक्रम मन के संचालन करे जात हे, जेखर से मनखे मन ल रोजगार के भरपूर अवसर मिलय। संगेच उंखर आमदनी म सरलग बढ़ोतरी होवय। उमन बताइन कि एखर परिणामस्वरूप आज विकास के छत्तीसगढ़ मॉडल के चर्चा पूरा देश म होवत हे। मुख्यमंत्री श्री बघेल ह कहिन कि छत्तीसगढ़ म चलाए जात योजना अऊ कार्यक्रम मन ले पूरा प्रदेश के विकास ल नवा दिशा मिले हे। एखर से किसान, मजदूर, गरीब, आदिवासी संग सबो वर्ग के मनखे मन ल आगू बढ़े के भरपूर अवसर मिले लगे हे।
ये बेरा म अखिल भारतीय कुर्मी समाज के केन्द्रीय अध्यक्ष श्री चोवाराम वर्मा अऊ राष्ट्रीय महासचिव श्री आर.एस. कनौजिया आदि मन ह घलोक संबोधित करिन अऊ छत्तीसगढ़ के विकास बर मुख्यमंत्री श्री बघेल के अगुवई म राज्य सरकार कोति ले चलाए जात कार्यक्रम मन के सराहना करिन। प्रतिनिधि मंडल म राष्ट्रीय अध्यक्ष अखिल भारतीय कुर्मी समाज अऊ मतदाता जागृति मंच श्री नंदकुमार बघेल अऊ आन पदाधिकारी सर्वश्री संतोष कुमार, क्रांतिकुमार, नारायण सिंह, अनिल कुमार चौधरी, श्याम पटेल, सुनील देशायी, विमल साहू, सुनील गहलोत, श्रीमती शर्मिला जोहरी, डॉ. दीनानाथ वर्मा, के.पी. कुर्मवंशी, डी.पी. पटेल, सुश्री पूजा मौरे, सुश्री प्रतिभा सिंह, विजय पटेल, डी.राजशेखर रेड्डी, रमाशंकर पटेल आदि सामिल रहिन।
