छत्तीसगढ़ म हॉकी लीग के आयोजन के तियारी, ‘छत्तीसगढ़ क्रीड़ा प्रोत्साहन योजना’ बर 57 करोड़ के बजट
उप मुख्यमंत्री श्री अरुण साव ह प्रेस-कॉन्फ्रेंस म खेल अउ युवा कल्याण विभाग के काम मन के दिहिन जानकारी
रायपुर, उप मुख्यमंत्री अउ खेल एवं युवा कल्याण मंत्री श्री अरुण साव ह आज प्रेस-कॉन्फ्रेंस म खेल अउ युवा कल्याण विभाग के काम, गतिविधि, सफलता मन अउ आवइया दिन के कार्ययोजना मन के जानकारी दीन। ओ मन ह नवा रायपुर स्थित छत्तीसगढ़ संवाद ऑडिटोरियम म आयोजित प्रेस-कॉन्फ्रेंस म बताइन के छत्तीसगढ़ म खेल बर सुग्घर माहौल बनाए, खेल इंफ्रास्ट्रक्चर ल मजबूत करे, महिला खिलाड़ी मन ल बढ़ावा देहे अउ खेल प्रतिभा मन के पहचान करे बर चालू वित्तीय वर्ष 2026-27 म ‘मुख्यमंत्री खेल उत्कर्ष मिशन’ बर 100 करोड़ रूपिया के प्रावधान करे गे हे। उहें ‘छत्तीसगढ़ क्रीड़ा प्रोत्साहन योजना’ के तहत 57 करोड़ रूपिया के बजट प्रावधान रखे गे हे। खेल अउ युवा कल्याण विभाग के सचिव श्री यशवंत कुमार अउ उप संचालक श्रीमती रश्मि ठाकुर घलोक प्रेस-कॉन्फ्रेंस म उपस्थित रहिन।
उप मुख्यमंत्री श्री अरुण साव ह प्रेस-कॉन्फ्रेंस म बताइन के राज्य म हॉकी लीग के आयोजन के तियारी चलत हे। राज्य के खेल अकादमी मन म उच्च स्तरीय प्रशिक्षण देहे बर 14 प्रशिक्षक मन ल प्रशिक्षण बर पटियाला भेजे गे हे। ओ मन ह बताइन के खेल गतिविधि मन के सुचारू संचालन बर राज्य सरकार ह 6 नवा जिला — गौरेला-पेंड्रा-मरवाही, खैरागढ़-छुईखदान-गंडई, मोहला-मानपुर-अंबागढ़-चौकी, सारंगढ़-बिलाईगढ़, मनेंद्रगढ़-चिरमिरी-भरतपुर अउ सक्ती म खेल अधिकारी के पद के सृजन करे हे। विभागीय योजना मन के प्रभावी क्रियान्वयन बर 44 प्रशिक्षक, 4 जिला खेल अधिकारी, 23 सहायक ग्रेड-3 अउ 8 वार्डन मन के भर्ती प्रक्रिया म हे।
श्री साव ह बताइन के राज्य म जादा ले जादा लइका अउ युवा मन खेल के मैदान म पहुँचयं, एकर बर सरकार सक्रियता अउ गँभीरता ले काम करत हे। छत्तीसगढ़ राज्य के निर्माण के समय सुध 4 करोड़ रूपिया के बजट वाले खेल अउ युवा कल्याण विभाग के बजट चालू वित्तीय वर्ष 2026-27 म 304 करोड़ रूपिया तक पहुँच गे हे। दूर-दराज के आदिवासी वनांचल मन ल खेल के मुख्य धारा ले जोड़े बर नवा पहल करत पाछू दू बछर ले बस्तर ओलंपिक के आयोजन के संगे च ए बछर ले सरगुजा ओलंपिक घलोक राज्य म सुरु करे गे हे। देश के पहिली ‘खेलो इंडिया ट्राइबल गेम्स’ के सुग्घर मेजबानी ह छत्तीसगढ़ ल देश के खेल मानचित्र म प्रतिष्ठित करे हे।