विष्णुदेव साय सरकार के नीति मन ले खुलत हे विकास के नवा दुवार
रायपुर, कभू नक्सल प्रभावित राज्य के चिन्हारी ले जाने जात छत्तीसगढ़ अब तेजी ले देस के उभरत पर्यटन हब के रूप म अपन पहिचान बनावत हे। प्राकृतिक सुघराई, जुन्ना धरोहर अउ जीवंत आदिवासी संस्कृति ले भरे ए प्रदेस ह अब नवा नीति अउ बुनियादी ढाँचा के विकास के सेती देस-बिदेस के सैलानी मन बर आकर्षण के केंद्र बनत जावत हे।
राज्य सरकार के प्राथमिकता म सुरक्षा, कनेक्टिविटी अउ पर्यटन अधोसंरचना ला सबले ऊपर जगह देहे गे हे। नवा औद्योगिक नीति 2024-30 म पर्यटन ला उद्योग के दरजा दे के निवेशक मन ला सब्सिडी, टैक्स म छूट अउ बढ़ावा देहे गे हे। राज्य म इको-एथनिक अउ एडवेंचर टूरिज्म बर करोड़ों रुपया के निवेश प्रस्ताव मिले हे। बस्तर संभाग के पहिचान ओकर जीवंत परंपरा मन ले हे। गोंड, मुरिया, हल्बा अउ बैगा जनजाति मन के रहन-सहन, पारंपरिक खाय-पिये, हस्तशिल्प अउ लोक नाच ह पर्यटक मन ला खास रूप म खींचथे। पंथी, राउत नाचा, सुवा अउ कर्मा जइसे लोक नाच ह प्रदेस के सांस्कृतिक चिनहारी बन गे हें।
प्रदेस म बने प्राकृतिक, ऐतिहासिक अउ धार्मिक ठउर मन ह तेजी ले पर्यटक मन के पसंद बनत हें। छत्तीसगढ़ ह पर्यटन के क्षेत्र म अपन विविधता ले देस-बिदेस के सैलानी मन ला लुभावत हे। चित्रकोट जलप्रपात, जेला एशिया के नियाग्रा कहे जाथे, ये ह एडवेंचर प्रेमी मन के मनभावन जगा आय। जशपुर के मधेश्वर पर्वत ह मन ला खींचथे, जेन दुनिया के सबले बड़े प्राकृतिक शिवलिंग आय। रहस्यमयी कुटुमसर गुफा मन एडवेंचर के थ्रिल देथें। रामगढ़ के जुन्ना नाट्यशाला ह राम वनवास ठउर के रूप म धार्मिक धरोहर के जीवंत चिनहा आय। डोंगरगढ़ के मां बम्लेश्वरी मंदिर ह धार्मिक पर्यटन के प्रमुख केंद्र हे। ए सबो ठउर ह राज्य सरकार के विकास योजना मन ले अउ सुग्घर बनत हें। यूएनडब्ल्यूटीओ कोति ले सबले बढ़िया पर्यटन गाँव के रूप म चुने गय धुड़मारास गाँव ह छत्तीसगढ़ के आदिवासी संस्कृति ला दुनिया भर म चिन्हारी देवाए हे।
ए सबो जगा मन के तीर-तखार म सड़क, बिजली, सुरक्षा अउ पर्यटक सुविधा मन के विस्तार करे जात हे, जेकर ले पर्यटक मन के संख्या सरलग बाढ़त हे। सरकार के योजना मन ले पर्यटन ह सिरिफ घूमे-फिरे तक सीमित नइ रहि गे हे, बल्कि ए ह स्थानीय रोजगार के बड़का जरिया बनत जावत हे। होम-स्टे, हस्तशिल्प, स्थानीय जेवन अउ गाइड सेवा मन के माध्यम ले गाँव अउ आदिवासी क्षेत्र मन के आय म बढ़ोत्तरी होवत हे। अवइया बछर मन म छत्तीसगढ़ ह देस के प्रमुख इको-कल्चरल पर्यटन राज्य मन म सामिल हो सकथे। छत्तीसगढ़ ह नक्सल चिनहारी ले बाहिर निकल के पर्यटन के नवा पहिचान गढ़त हे अउ विकास के नवा उड़ान भरत दिखत हे।
