दिल्ली, 08 जून 2024। छत्तीसगढ़ के मुख्यमंत्री श्री विष्णुदेव साय ह आज नई दिल्ली म बने छत्तीसगढ़ के नवा अतिथि गृह छत्तीसगढ़ निवास के निरीक्षण करिन। ए बेरा म उमन व्यवस्था मन के जायजा लेके अधिकारी मन ल जरूरी निर्देश दीन।
मुख्यमंत्री के संग स्वास्थ्य मंत्री श्री श्याम बिहारी जायसवाल, अनुसूचित जाति अउ जनजाति विकास मंत्री श्री रामविचार नेताम अउ लुण्ड्रा विधायक प्रबोध मिंज घलोक संग म रहिन।
देश के राजधानी दिल्ली के द्वारका म छत्तीसगढ़ के पहुना मन के थिराये बर 60 करोड़ 42 लाख के लागत ले छत्तीसगढ़ निवास के निर्माण करे गए हे। मुख्यमंत्री आज अतिथि गृह पहुंचिन अऊ उहां के व्यवस्था के निरीक्षण करिन। ए बेरा म उमन सफाई, सुरक्षा अऊ आन सुविधा मन के जायजा लीन। उमन निर्माण काम के गुणवत्ता अऊ सुविधा मन के गहन निरीक्षण कर अधिकारी मन ले जानकारी लीन। मुख्यमंत्री श्री साय ह अधिकारी मन ल निर्देश दीन कि छत्तीसगढ़ निवास म रूकईया पहुना मन ल कोनो प्रकार के असुविधा झन होवय अऊ उंखर जरूरत के ध्यान रखे जाय।
जनबा हे के द्वारका के सेक्टर 13 म छत्तीसगढ़ के अतिथि मन बर नवा अतिथि गृह छत्तीसगढ़ निवास के निर्माण करे गए हे। छत्तीसगढ़ निवास म 10 सूट रूम, 67 कमरा, डाइनिंग हॉल एंड वेटिंग संग मीटिंग हॉल अऊ कर्मचारी मन बर टावर के निर्माण करे गए हे। निरीक्षण के समय मुख्यमंत्री श्री विष्णुदेव साय के संग मीडिया सलाहकार श्री पंकज झा, प्रेस अधिकारी श्री आलोक सिंह, जनसंपर्क आयुक्त श्री मयंक श्रीवास्तव, आवासीय आयुक्त श्रुति सिंह आदि अधिकारी उपस्थित रहिन।