राजभाषा आयोग के तीन दिन के छत्तीसगढ़ी प्रशिक्षण कार्यशाला पूरा

रायपुर, 29 फरवरी 2024। छत्तीसगढ़ राजभाषा आयोग ह मंत्रालय महानदी भवन म तीन दिन के छत्तीसगढ़ी प्रशिक्षण कार्यशाला पूरा होइस। प्रशिक्षण म मंत्रालयीन अधिकारी कर्मचारी मन ल छत्तीसगढ़ी के व्यवहारिक रूप ले उपयोग के संगे-संग शासकीय कामकाज म छत्तीसगढ़ी भाखा म काम करे बर प्रशिक्षित करे गीस। प्रशिक्षण कार्यक्रम के समय प्रशिक्षिणार्थी मन ल लोक व्यवहार अऊ प्रशासनिक काम म छत्तीसगढ़ी के उपयोग अऊ शब्दावली मन के विस्तार ले जानकारी देहे गीस।
छत्तीसगढ़ राजभाषा आयोग नवा रायपुर कोति ले आयोजित छत्तीसगढ़ी प्रशिक्षण कार्यशाला म पहिली दिन 26 फरवरी के लगभग 130 मंत्रालयीन कर्मचारी ह प्रशिक्षण के लाभ लीन। जेमां छत्तीसगढ़ के साहित्यविद् अऊ लेखक डॉ. चितरंजन कर ह व्याख्यान दीस अऊ छत्तीसगढ़ी राजभाषा के प्रशासनिक उपयोग बर कर्मचारी मन ल प्रोत्साहित करीस। कार्यशाला के दूसर दिन 27 फरवरी के शिक्षाविद डॉ. सुधीर शर्मा ह मंत्रालयीन कर्मचारी मन ल लोक व्यवहार अऊ प्रशासनिक काम मन म छत्तीसगढ़ी के उपयोग अऊ शब्दावली मन के ज्ञान प्रदान करीस। अइसनहे आज 28 फरवरी के प्रशिक्षण सत्र के आखरी दिन मंत्रालय के अवर सचिव अऊ अनुभाग अधिकारी स्तर के अधिकारी मन ल प्रशिक्षण प्रदान करे गीस।
प्रशिक्षण कार्यशाला म छत्तीसगढ़ राजभाषा आयोग के सचिव डॉ. अनिल कुमार भटपहरी ह प्रदेश म छत्तीसगढ़ी के सांस्कृतिक महत्व, लोकभाषा, शिक्षा अऊ पाठयक्रम म सामिल करे के संबंध म जरूरी जानकारी दीन। उमन छत्तीसगढ़ी के संरक्षण अऊ लोक व्यवहार म छत्तीसगढ़ी के परयोग ल महत्वपूर्ण बताइन। उमन कहिन कि हम सबो के छत्तीसगढ़ी के प्रति मया, दुलार अऊ प्रेम-भाव होना चाही। प्रशिक्षक सहायक प्राध्यपक डॉ. रोशनी मिश्रा ह छत्तीसगढ़ी ल अपन दैनिक व्यवहार म अपनाए के बात कहीन। उमन कहिन कि छत्तीसगढ़ी भाखा म अब्बड़ मिठास हे। उमन छत्तीसगढ़ी हिज्जा, व्याकरण अउ छत्तीसगढ़ी के सांस्कृतिक महत्व उपर प्रकाश डालीन। प्रशिक्षण कार्यक्रम म मंत्रालयीन कर्मचारी अधिकारी संघ के अध्यक्ष श्री महेन्द्र राजपूत, श्री देवलाल भारती संग आन अधिकारी कर्मचारी मन ह घलोक संबोधित करीन।