कांकेर जिला बेस्ट इनलैंड डिस्ट्रिक्ट अवार्ड बर चुने गीस
मुख्यमंत्री श्री विष्णु देव साय ह दीन बधाई
रायपुर, छत्तीसगढ़ राज्य ह मत्स्य पालन के क्षेत्र म राष्ट्रीय स्तर म एक पइत फेर गौरवपूर्ण उपलब्धि हासिल करे हे। छत्तीसगढ़ के कांकेर जिला ल मत्स्य पालन के क्षेत्र म देश म बेस्ट इनलैंड डिस्ट्रिक्ट अवार्ड बर चुने गए हे। कांकेर जिला ल ये राष्ट्रीय अवार्ड 21 नवंबर विश्व मात्स्यिकीय दिवस के अवसर म देहे जाही। केंद्रीय मत्स्यपालन, पशुपालन, डेयरी अउ पंचायतीराज मंत्री श्री राजीव रंजन सिंह उर्फ ललन सिंह नई दिल्ली के चाणक्यपुरी स्थित सुषमा स्वराज भवन म आयोजित कार्यक्रम ये सम्मान देहीं। कार्यक्रम म केंद्रीय मत्स्य पालन, पशुपालन, डेयरी अउ पंचायतीराज राज्य मंत्री प्रोफेसर एस.पी. सिंह बघेल अउ श्री जॉर्ज कुरियन घलोक उपस्थित होहीं।
मुख्यमंत्री श्री विष्णु देव साय ह कांकेर ल देश के बेस्ट इनलैंड डिस्ट्रिक्ट अवार्ड बर चयन होए म प्रसन्नता जताए हे। उमन ए गौरवपूर्ण उपलब्धि बर कांकेर संग राज्य के सबो मत्स्य कृषक अउ मछलीपालन विभाग के अधिकारी मन ल बधाई अऊ शुभकामना देहे हे। मुख्यमंत्री ह कहे हें के छत्तीसगढ़ लैंड लॉक प्रदेश होए के बाद घलोक मत्स्य पालन के क्षेत्र म देश म अग्रणी स्थान म हे। मछली बीज उत्पादन म छत्तीसगढ़ देश म छठवां स्थान म हे। ये उपलब्धि हमार राज्य के मत्स्य कृषक मन के मेहनत के परिणाम हे। छत्तीसगढ़ मछली बीज उत्पादन के मामला म न सिरिफ पूरा प्रकार ले आत्मनिर्भर हे, भलुक पड़ोसी राज्य मन ल घलोक मछली बीज निर्यात करत हे।
जानबा हे कि छत्तीसगढ़ म कुल 1,29,039 जल स्त्रोत हे, जेखर जल क्षेत्र 2.032 लाख हेक्टेयर हे, जेमें 96 प्रतिशत म कोनो न कोनो रूप म मत्स्य पालन होवत हे। इहां 3571 कि.मी के नदीय जलक्षेत्र घलोक हे। सघन मत्स्य पालन बर अकतहा जलक्षेत्र निर्मित करे जात हे. अब तक कुल 6783 हेक्टर जलक्षेत्र निर्मित हो चुके हे। एक समय रहिस जब छत्तीसगढ़ मत्स्य बीज बर पश्चिम बंगाल राज्य उपर निर्भर रहिस। कुल 82 नवा हैचरी बना के 115 हैचरी मन के माध्यम ले 546 करोड़ मत्स्य बीज के हर साल उत्पादन होए ले राज्य न सिरिफ आत्मनिर्भर होय हे भलुक आन राज्य मन ल घलोक मत्स्य बीज निर्यात करत हे।
छत्तीसगढ़ म अभी हाल म हर साल 7.30 लाख टन मत्स्य उत्पादन होवत हे। राज्य अन्तर्देशीय मत्स्य उत्पादन म देश म 8 वां स्थान म हे। राज्य म अकतहा मत्स्य उत्पादन बर जलाशय अउ बंद खदान मन म अब तक 9551 केज, 415 बायोफ्लॉक, 06 आर.ए.एस. अउर 253 बॉयोफलॉक पॉण्ड स्थापित करे गए हे। रायपुर, दुर्ग बिलासपुर अउ जांजगीर म थोक मत्स्य बाजार के स्थापना करे गए हे। प्रदेश के मत्स्य पालक मन के एन.एफ.डी.पी. योजना अंतर्गत पंजीयन करे जात हे। छत्तीसगढ़ राज्य के मत्स्य पालक मन ल किसान क्रेडिट कार्ड के माध्यम ले बैंक ले करजा के सुविधा देहे जात हे। पात्रतानुसार मत्स्य कृषक मन ल एक प्रतिशत ले लेके तीन प्रतिशत ब्याज म अल्प अवधि ऋण घलोक देहे जात हे।
