किसान प्रेमचंद लहरे 9.61 लाख के धान बेचके करही भतीजी के बिहाव

सारंगढ़-बिलाईगढ, खरीफ विपणन वर्ष 2025-26 म जिला म धान खरीदी के काम तेजी अउ पारदर्शिता के संग चलत हे। 15 नवंबर ले शुरू होए धान खरीदी के अंतर्गत सारंगढ़-बिलाईगढ जिला म कुल 89 हजार 181 किसान पंजीकृत हें, जेमा ले अब तक 72 हजार 258 किसान मन ले 3 लाख 71 हजार 291 टन धान के खरीदी समिति मन डहर ले करे जा चुके हे। ए प्रकार जिला म लगभग 76 प्रतिशत धान खरीदी के लक्ष्य पूरा हो चुके हे।
विकासखंड सारंगढ़ के धान उपार्जन केंद्र कोसीर म पंजीकृत ग्राम भाठागांव निवासी किसान श्री प्रेमचंद लहरे ह बिना कोनो परेशानी के सिरिफ दू टोकन के माध्यम ले 310 क्विंटल धान बेचिस। धान बेचे के एवज म ओला 9 लाख 61 हजार रूपिया के राशि के तुरंत भुगतान सीधा ओखर बैंक खाता म मिलिस।
धान बेचे ले मिले ए राशि ह किसान श्री प्रेमचंद लहरे के परिवार म खुसी के माहौल बना दे हे। ओ खुसी जतावत बताइस के ओखर भतीजी के बिहाव तय हो चुके हे अउ धान बेचे ले मिले राशि के उपयोग वो ह इही सुभ काम म करही। ओ ह कहिस के राज्य सरकार के किसान हितवा नीति मन के कारण आज किसान मन ल समय म भुगतान मिलत हे अउ काम सही ढंग ले चलत हे।
किसान श्री प्रेमचंद लहरे ह मुख्यमंत्री विष्णु देव साय के आभार जतावत कहिस के ओखर अगुवइ म धान खरीदी बेवस्था सरल, पारदर्शी अउ भरोसा लायक बने हे। बता देवन के शासन के निर्देश के मुताबिक जिला म धान खरीदी के काम जिला प्रशासन के मार्गदर्शन म सबो उपार्जन केंद्र मन म किसान मन के सुविधा ल धियान म रखत सफलता के संग चलाए जात हे। समय म भुगतान अउ बढ़िया बेवस्था ले किसान संतुष्ट हें अउ राज्य शासन के प्रति आभार मानत हें।