अवैध परिवहन, भंडारण अउ मिलिंग ऊपर प्रशासन सख़्त, कतको जिला मन म बड़का कार्रवाई
रायपुर, छत्तीसगढ़ म समर्थन मूल्य म धान खरीदी बेवस्था ल पूरा पारदर्शी, निष्पक्ष अउ किसान-केंद्रित बनाए रखे के उद्देश्य ले छत्तीसगढ़ शासन डहर ले अवैध धान परिवहन, भंडारण, बिक्री अउ मिलिंग म गड़बड़ी के खिलाफ राज्यभर म बड़का अउ सघन अभियान चलाए जात हे। शासन के साफ निर्देश के हिसाब ले राजस्व, खाद्य, मंडी अउ पुलिस विभाग के संघरा टीम डहर ले अंतर्राज्यीय सीमा, धान खरीदी केंद्र, राइस मिल अउ शंका वाला जगा मन म सरलग नजर रखत कड़ा कार्रवाई करे जात हे, ताकि धान खरीदी के लाभ सिरिफ असली किसान मन ल ही मिल सकय।
खाद्य सचिव श्रीमती रीना कंगाले ह कहिन के राज्य सरकार धान खरीदी बेवस्था ल पूरा पारदर्शी, निष्पक्ष अउ किसान-हितैषी बनाए रखे बर प्रतिबद्ध हे। ओ मन साफ करिन के समर्थन मूल्य म धान खरीदी के प्रक्रिया म कोनो भी प्रकार के गड़बड़ी, अवैध परिवहन, भंडारण, बिक्री या मिलिंग ल बिल्कुल बरदास नइ करे जाय। ओ मन कहिन के शासन के साफ निर्देश हे के धान खरीदी के लाभ सिरिफ असली किसान मन ल ही मिलय। दलाल, फर्जी टोकन, मिलावट, अंतर्राज्यीय अवैध परिवहन अउ कस्टम मिलिंग म गड़बड़ी करइया मन के खिलाफ शुरुआती स्तर म ही सख्त कार्रवाई करे जात हे। ओ मन बताइन के राज्यभर म राजस्व, खाद्य, मंडी अउ पुलिस विभाग के साझा टीम मन डहर ले सरलग निगरानी अउ भौतिक सत्यापन करे जात हे। ओ मन ए घलो कहिन के जिहां कहूं भी नियम के उल्लंघन पाए जाही, उहां संबंधित व्यक्ति, संस्था या मिल संचालक के खिलाफ छत्तीसगढ़ चावल उपार्जन आदेश 2016, आवश्यक वस्तु अधिनियम 1955 अउ आने कानूनी नियम मन के तहत कड़ा ले कड़ा कार्रवाई सुनिश्चित करे जाही। खाद्य सचिव ह दोहराइस के किसान मन के हित के रक्षा अउ धान खरीदी बेवस्था के पवित्रता बनाए रखना शासन के सबले बड़े प्राथमिकता हरे।
इही कड़ी म महासमुंद जिला म कलेक्टर विनय कुमार लंगेह के निर्देशानुसार अवैध धान परिवहन ऊपर बड़ कार्रवाई करत सरायपाली विकासखंड के अंतर्गत रेहटीखोल क्षेत्र म बीती रात साझा टीम डहर ले एक ट्रक ले 694 बोरा धान जब्त करे गीस। जब्त धान के कुल वजन लगभग 319 क्विंटल पाए गीस। जांच के दौरान ए पाए गीस के वो ट्रक म उड़ीसा ले छत्तीसगढ़ कोति बिना कोनो वैध कागज-पत्तर के धान के परिवहन करे जात रहिस। परिवहन ले संबंधित जरूरी कागज नइ देखाए म धान ले भरे ट्रक ल मउका म ही जब्त कर आघू के कानूनी कार्रवाई बर थाना सिंघोड़ा के सुपुर्द करे गीस। जिला प्रशासन ह साफ करे हे के अंतर्राज्यीय सीमा मन म अवैध धान परिवहन रोके बर सरलग निगरानी रखे जात हे अउ शंका वाला गाड़ी मन के गहिर जांच करे जात हे, ताकि धान खरीदी प्रणाली के सुचिता बने रहय।
धान खरीदी बेवस्था म पारदर्शिता सुनिश्चित करे के तहत धमतरी जिला म गंभीर गड़बड़ी पाए जाए म प्राथमिक कृषि सहकारी साख समिति मर्यादित मोहदी के समिति प्रबंधक अउ ऑपरेटर ल नौकरी ले निकाल दे गए हे। निरीक्षण के बेरा मिलावट वाला धान, टोकन के दुरुपयोग अउ अवैध बिक्री के मामला आघू आए रहिस। प्रशासन ह साफ करे हे के धान खरीदी बेवस्था म गड़बड़ी करइया मन के खिलाफ शुरुआती स्तर म ही कड़ा कार्रवाई करे जावत हे, ताकि खरीदी के लाभ सिरिफ असली किसान मन तक ही सीमित रहय अउ दलाल मन ऊपर प्रभावी रोक लगाए जा सकय।
इही प्रकार 13 जनवरी 2026 ल बलौदाबाजार-भाटापारा जिला म राजस्व, खाद्य अउ मंडी विभाग के साझा टीम ह ग्राम बिलारी (सोनाखान) म अवैध रूप ले परिवहन करे जात 75 कट्टा धान समेत एक पिकअप गाड़ी जब्त कर पुलिस थाना सलीहा-बिलाईगढ़ के सुपुर्द करिस।
सरगुजा जिला म कलेक्टर के निर्देशन म राइस मिल मन के सघन भौतिक सत्यापन करे गीस। जांच म राजेश राइस मिल खोडरी अउ सिद्धिविनायक राइस मिल दरिमा म धान के भारी कमी पाए गीस। कस्टम मिलिंग आदेश 2016 अउ आवश्यक वस्तु अधिनियम 1955 के तहत संबंधित मिल मन के खिलाफ कानूनी कार्रवाई करे जावत हे।
महासमुंद जिला म अलग-अलग जगा म करे गए कार्रवाई के दौरान साझा टीम डहर ले कुल 217 कट्टा धान अउ एक पिकअप गाड़ी जब्त करे गीस। अवैध परिवहन अउ भंडारण के मामला म मंडी अधिनियम के तहत केस दर्ज करे जावत हे। खरीफ विपणन वर्ष 2025-26 म महासमुंद जिला म अब तक करे गए कार्रवाई म बीते दू दिन म कुल 2986 कट्टा अवैध धान जब्त करे गए हे। कलेक्टर डहर ले अंतर्राज्यीय जांच चौकी टेमरी, नर्रा अउ खट्टी समेत धान खरीदी केंद्र मन के औचक निरीक्षण कर कड़ा निर्देश देहे गए हे। पिथौरा, बसना अउ सरायपाली क्षेत्र मन म अलग-अलग मामला म भारी मात्रा म अवैध अउ शंका वाला धान जब्त कर संबंधित विभाग मन ल कार्रवाई के निर्देश दे गए हे। कई मामला म धान ल पुलिस थाना के सुपुर्द करे गए हे।
बिलासपुर जिला म धान उठाव म गंभीर गड़बड़ी आघू आए म अमरनाथ एग्रो प्रोडक्ट राइस मिल ऊपर बड़ कार्रवाई करत मिल ल सील करे गीस अउ संचालक के खिलाफ एफआईआर (FIR) दर्ज करे गए हे। मउका ले 54 हजार क्विंटल ले जादा धान जब्त करे गीस, जेखर अनुमानित कीमत लगभग 16 करोड़ रूपिया हे। भौतिक सत्यापन म कस्टम मिलिंग बर जारी धान के तुलना म हजारों क्विंटल धान के कमी पाए गीस। दू दिन तक चले गहिर जांच के बाद गड़बड़ी के पुष्टि होते ही तत्काल कार्रवाई करे गीस। खाद्य विभाग के अनुसार बिलासपुर जिला म अब तक 56 करोड़ रूपिया ले जादा कीमत के धान जब्त करे जा चुके हे। ए कार्रवाई छत्तीसगढ़ चावल उपार्जन आदेश 2016 के उल्लंघन के अंतर्गत करे गए हे। जिला प्रशासन ह दो टूक कहे हे कि धान खरीदी, परिवहन, भंडारण अउ मिलिंग म कोनो भी प्रकार के गड़बड़ी पाए जाए म संबंधित व्यक्ति, संस्था अउ मिल संचालक मन के खिलाफ कड़ा ले कड़ा कानूनी कार्रवाई करे जाही।
