राज्य म 3.94 करोड़ लीटर पेट्रोल अउ 8.09 करोड़ लीटर डीजल के स्टॉक
रायपुर, छत्तीसगढ़ म पेट्रोल अउ डीजल के पूरा भंडार मौजूद हे अउ आम जनता ला हड़बड़ा के जादा खरीदी या ओला स्टाक करे के कोनो जरूरत नइ हे। राज्य म ईंधन के आपूर्ति पूरा सामान्य हे अउ किसान मन अउ जरूरी सेवा मन ला पहिली प्राथमिकता देवत रोज के सप्लाई पक्का करे जावत हे।
इहां ए बात बताए के लाइक हे के राज्य म अभी के बखत म 3 करोड़ 94 लाख 7 हजार 700 लीटर पेट्रोल अउ 8 करोड़ 8 लाख 83 हजार लीटर डीजल के स्टॉक मौजूद हे। राज्य म पेट्रोल अउ डीजल के आपूर्ति बर जम्मो 2516 पेट्रोल पंप चलत हे। खाद्य विभाग के कहे मुताबिक रबी फसल के लुवाई अउ खरीफ सीजन के तइयारी के सेती डीजल के मांग म बढ़त ला देखत ऑयल कंपनी मन के लखौली अउ मंदिर हसौद (रायपुर) अउ गोपालपुर (कोरबा) म स्थित डिपो ले जिला मन ला सरलग जरूरत के मुताबिक सप्लाई करे जात हे।
धियान देहे वाला बात ए हे के 22 मई 2026 के ही राज्य ला 21 लाख 83 हजार लीटर पेट्रोल अउ एक करोड़ 29 लाख 75 हजार लीटर डीजल मिले हे। एकर संगेच हर दीन नियम से पेट्रोल अउ डीजल के आपूर्ति जारी हे।
खाद्य सचिव ह राज्य म ईंधन के उपलब्धता अउ बांटै के ब्यवस्था के समीक्षा बर 20 मई 2026 के जम्मो ऑयल कंपनी मन के अधिकारी मन के संग बैठक घलो करे रहिन। बैठक म निर्देश देहे गीस के जेन पेट्रोल पंप मन म स्टॉक सिराए के स्थिति बनत होही, उहाँ डिपो ले तुरंत सप्लाई पक्का करे जाय ताकि कोनो इलाका म लोगन मन ला दुख-तकलीफ झन होवय।
राज्य सासन ह 22 मई 2026 ले प्रदेश के जम्मो पेट्रोल अउ डीजल पंप मन म ड्रम अउ जरीकेन म पेट्रोल-डीजल देहे ऊपर रोक लगा देहे हे। तभो ले किसान मन ला अउ कलेक्टर कोती ले तय करे गे बड़ जरूरी सेवा मन ला ए रोक ले छूट देहे गे हे। राज्य सासन ह आम नागरिक मन ले बिनती करे हे के ओमन कोनो किसम के अफवाह या भरम म आके डर के मारे जादा खरीदी या एकर जमाखोरी झन करंय। जरूरत के मुताबिक जम्मो उपभोक्ता मन ला पेट्रोल अउ डीजल के सुघर उपलब्धता पक्का करे बर राज्य स्तर ऊपर जम्मो जरूरी ब्यवस्था करे गए हे।
