- पुलिस म सद्भावना पूर्ण व्यवहार अऊ समाधान के नजरिया होना चाही: श्री भूपेश बघेल
- राज्य पुलिस अकादमी म अत्याधुनिक फॉरेंसिक साइंस लैब, आदर्श थाना भवन निर्माण अऊ सीनियर ऑफीसर्स मैस के स्वीकृति के घोषणा
रायपुर, मुख्यमंत्री श्री भूपेश बघेल आज छत्तीसगढ़ राज्य पुलिस अकादमी चंदखुरी म प्रशिक्षणरत् 23 उप पुलिस अधीक्षक (नवम सत्र) अऊ 12 उप निरीक्षक परिवहन, दूरसंचार (द्वितीय सत्र) के दीक्षांत परेड समारोह म सामिल होइन। उमन परेड के निरीक्षण करिन अऊ दीक्षांत परेड के सलामी लीन।
मुख्यमंत्री श्री भूपेश बघेल ह पुलिस अधिकारी मन ल संबोधित करत कहिन कि पुलिस म सद्भावना पूर्ण व्यवहार अऊ समाधान के नजरिया होना चाही। पुलिस म युवा केवल आजीविका बर नइ, अपन माटी के करजा चुकाए के भावना के संग आथें। जब पुलिस के अधिकारी-कर्मचारी अपन सर्वस्व न्यौछावर करे के भावना के संग अपन कर्तव्य मन के निर्वहन करत हें, तभे हम अपन घर म सुरक्षित रहि पाथन। राज्य अऊ देश के विकास म घलोक सुरक्षापूर्ण वातावरण के महत्वपूर्ण भूमिका होथे।
कार्यक्रम म गृह मंत्री श्री ताम्रध्वज साहू अऊ नगरीय प्रशासन मंत्री डॉ. शिवकुमार डहरिया, विधायक श्री मोहन मरकाम अऊ जिला पंचायत अध्यक्ष श्रीमती शारदा वर्मा विशिष्ट अतिथि के रूप म उपस्थित रहिन। दीक्षांत परेड समारोह म गृह विभाग के अपर मुख्य सचिव श्री सी.के. खेतान, पुलिस महानिदेशक श्री डी.एम. अवस्थी अऊ आन वरिष्ठ पुलिस अधिकारी घलोक उपस्थित रहिन।
