हर चुनौती ले निपटे बर छत्तीसगढ़ पुलिस हे सामरथ : मुख्यमंत्री श्री भूपेश बघेल

रायपुर, मुख्यमंत्री श्री भूपेश बघेल ह कहिन के छत्तीसगढ़ पुलिस हर प्रकार के चुनौती ले निपटे म सक्षम हे अऊ उंखर सरकार राज्य के हर एक नागरिक ल सुरक्षित वातावरण देहे बर प्रतिबद्ध हे। मुख्यमंत्री श्री भूपेश बघेल आज चंदखुरी स्थित नेताजी सुभाषचंद्र बोस पुलिस एकेडमी म प्रशिक्षु उप पुलिस अधीक्षक मन के दीक्षांत समारोह म संघरे रहिन। चंदखुरी म दसवा बैच के 33 अऊ ग्यारहवा बैच के 9 प्रशिक्षु उप पुलिस अधीक्षक मन ह पासिंग आउट परेड म भाग लीन। सुकरवार के भिनसरहा 9.30 बजे मुख्यमंत्री श्री बघेल दीक्षांत समारोह मे सामिल होइन, एखर बाद परेड ह मुख्यमंत्री ल सलामी दीस। सलामी के बाद मुख्यमंत्री श्री बघेल ह परेड के निरीक्षण करिन अऊ प्रशिक्षार्थि मन ल शपथ ग्रहण कराइन। दीक्षांत परेड समारोह म गृहमंत्री श्री ताम्रध्वज साहू, नगरीय विकास मंत्री डॉ शिव कुमार डहरिया अऊ छत्तीसगढ़ के पुलिस महानिदेशक श्री अशोक जुनेजा घलोक सम्मिलित होइन। परेड के मार्च पास्ट के बाद महानिदेशक, पुलिस अकादमी श्री डी एम अवस्थी ह ये बेरा म स्वागत भाषण दे अऊ प्रतिवेदन के वाचन करिन।