छत्तीसगढ़ जनसंपर्क अधिकारी संघ ह जुन्ना पेंशन योजना लागू करे बर मुख्यमंत्री के प्रति जताइस आभार

रायपुर, छत्तीसगढ़ जनसंपर्क अधिकारी संघ ह छत्तीसगढ़ म शासकीय सेवक मन बर जुन्ना पेंशन योजना लागू करे के घोषणा बर मुख्यमंत्री श्री भूपेश बघेल के प्रति आभार व्यक्त करे हे। संघ ह एला प्रदेश के कर्मचारी मन के हित म ऐतिहासिक फैसला बताए हे।
छत्तीसगढ़ जनसंपर्क अधिकारी संघ के प्रतिनिधि मंडल ह आज मुख्यमंत्री श्री बघेल ले विधानसभा परिसर स्थित ऊंखर कार्यालय कक्ष म सौजन्य मुलाकात करके ऊंखर प्रति आभार प्रकट करिन। जानबा हे कि मुख्यमंत्री श्री भूपेश बघेल ह वित्तीय साल 2022-23 के बजट म राज्य म जुन्ना पेंशन योजना लागू करे के घोषणा करे हें।
छत्तीसगढ़ जनसंपर्क अधिकारी संघ के अध्यक्ष श्री बालमुकुन्द तम्बोली ह मुख्यमंत्री श्री बघेल ल धन्यवाद ज्ञापित करत कहिन कि प्रदेश के लोकप्रिय मुख्यमंत्री श्री बघेल के ये संवेदनशील निर्णय ले शासकीय अधिकारी अऊ कर्मचारी मन म आर्थिक निश्चिंतता बाढ़े हे। सेवानिवृत्ति के बाद घलोक उंखर सम्मानपूर्वक पारिवारिक अऊ सामाजिक जीवन सुनिश्चित होए हे। उमन कहिन कि मुख्यमंत्री जी ह हमेशा शासकीय सेवक मन के हित म संवेदनशीलता के संग निर्णय लेहे हें। ते पाए के आज राज्य म शासकीय सेवक मन के मनोबल बहुत ऊंचा हे अऊ ओ मन पूरा मनोयोग ले शासकीय योजना अऊ नीति मन के क्रियान्वयन म जुटे हें। श्री तंबोली ह कहिन कि जुन्ना पेंशन योजना म कर्मचारी मन ल सेवानिवृत्ति के बाद एक निश्चित पेंशन राशि प्राप्त होही। संगेच आश्रित परिवार ल पेंशन के लाभ मिलही। ये घोषणा ले कर्मचारी मन के संगें-संग ऊंखर परिजन म घलोक खुशहाली के माहौल हे। एखर से सरकारी अधिकारी अऊ कर्मचारी जादा उत्साह अऊ समर्पण भाव ले काम करहीं अऊ छत्तीसगढ़ के विकास म सहभागी बनहीं।
प्रतिनिधि मंडल म छत्तीसगढ़ जनसंपर्क अधिकारी संघ के संरक्षक श्री जे.एल.दरियो अऊ श्री उमेश मिश्रा संग सर्वश्री प्रेमलाल पटेल, आनंद सोलंकी, मुन्नालाल चौधरी, मनराखन मरकाम, नितिन शर्मा, जरीफ खान, कमलेश साहू, कमलज्योति जाहिरे, सचिन शर्मा, ओमप्रकाश डहरिया, भवानी सिंह ठाकुर, रविन्द्र चौधरी सामिल रहिन।