मुख्यमंत्री श्री विष्णुदेव साय ह प्रधानमंत्री श्री नरेंद्र मोदी अउ रेल मंत्री श्री अश्विनी वैष्णव के प्रति जताइन आभार
छत्तीसगढ़ बनत हे रेल सुबिधा के छेत्र में देस के अगुआ राज्य – मुख्यमंत्री श्री साय
रायपुर, छत्तीसगढ़ में रेलवे अधोसंरचना विकास बर ₹7,470 करोड़ के ऐतिहासिक बजट प्रावधान करे जाय पर मुख्यमंत्री श्री विष्णु देव साय ह प्रधानमंत्री श्री नरेंद्र मोदी अउ रेल मंत्री श्री अश्विनी वैष्णव के प्रति हिरदे ले आभार प्रकट करे हें।
मुख्यमंत्री श्री साय ह कहिन के डबल इंजन सरकार के सरलग उदीम ले छत्तीसगढ़ म आज रेलवे छेत्र में अभूतपूर्व बदलाव दिखत हे। बछर 2009–14 के बखत में सालाना औसत ₹311 करोड़ के तुलना में 2026–27 में ₹7,470 करोड़ के बजट प्रावधान लगभग 24 गुना बढ़त के रिकॉर्ड आय। अभी के बखत में राज्य में ₹51,080 करोड़ के रेल काम आगू बढ़त हे, जेमा नवा ट्रैक निर्माण, स्टेशन मन के पुनर्विकास अउ सुरक्षा उन्नयन जइसे जरूरी काम सामिल हें।
मुख्यमंत्री श्री साय ह कहिन के दूरिहा वनांचल बस्तर में जगदलपुर ला जोड़इया रावघाट–जगदलपुर रेल प्रोजेक्ट के सुरू होना बस्तर के जनजातीय समाज बर केंद्र सरकार कोति ले एक अनमोल उपहार आय, जेहा छेत्रीय विकास के नवा रस्ता खोलही।
मुख्यमंत्री ह कहिन के परमलकसा–खरसिया कॉरिडोर के संग-संग नवा फ्रेट कॉरिडोर ला घलो मंजूरी देहे गे हे। ए योजना मन ले अवइया बखत म छत्तीसगढ़ म यात्री गाड़ी मन के संख्या लगभग दुगुना हो जाही।
ओमन कहिन के अमृत स्टेशन योजना के तहत राज्य के 32 रेलवे स्टेशन मन के आधुनिकीकरण करे जात हे, जेमा डोंगरगढ़ (फेज-I), अंबिकापुर, भानुप्रतापपुर, भिलाई अउ उरकुरा जइसे स्टेशन पूरा हो चुके हें। एकरे संग राज्य में वंदे भारत एक्सप्रेस के 2 जोड़ी अउ अमृत भारत एक्सप्रेस के 1 जोड़ी सेवा मन यात्री मन ला तेज, सुरक्षित अउ आधुनिक रेल सुबिधा देवत हें।
मुख्यमंत्री श्री साय ह कहिन के बछर 2014 ले अब तक लगभग 1,200 किलोमीटर नवा रेल ट्रैक के निर्माण, 100 प्रतिशत बिजलीकरण, 170 फ्लाईओवर/अंडरपास अउ ‘कवच’ जइसन आधुनिक सुरक्षा प्रणाली मन के स्थापना ले रेल सुबिधा के छेत्र में छत्तीसगढ़ देस के अगुआ राज्य मन में सामिल होत हे।
मुख्यमंत्री श्री विष्णु देव साय ह छत्तीसगढ़ के जनता कोति ले प्रधानमंत्री श्री नरेंद्र मोदी अउ रेल मंत्री श्री अश्विनी वैष्णव ला ए बड़का पहल मन बर हिरदे ले धन्यबाद देहे हें। उमन कहिन के ए विकास सिरिप रेल पटरी तक सीमित नइ हे, बल्कि एखर ले प्रदेस के व्यापार, पर्यटन, उद्योग, रोजगार अउ आम जनता के जिनगी में नवा उर्जा के संचार होत हे।
