‘गोधन न्याय योजना’ शुरू करे बर मुख्यमंत्री के जताइन आभार
रायपुर, 11 जुलाई 2020। मुख्यमंत्री श्री भूपेश बघेल ले काली इहां ऊंखर निवास कार्यालय म छत्तीसगढ़ रजक समाज महासंघ के प्रतिनिधि मंडल ह सौजन्य मुलाकात करिस। प्रतिनिधि मंडल ह ये मौका म राज्य म गोधन के संरक्षण, पशुपालक अउ किसान मन के हित मन के रक्षा बर छत्तीसगढ़ राज्य म गोधन न्याय योजना शुरू करे बर मुख्यमंत्री श्री भूपेश बघेल के आभार जताइन अऊ छत्तीसगढ़ रजक समाज कोति ले ओ मन ल चिनहा भेंट करके सम्मानित करिन। प्रतिनिधि मंडल ह ये बेरा म मुख्यमंत्री ले रजक समाज के समस्या मन ल लेके परखर गोठ बात करिन अऊ रजक कल्याण बोर्ड के गठन करे के आग्रह करत ज्ञापन सौंपिन।
मुख्यमंत्री श्री भूपेश बघेल ह गोधन न्याय योजना के सबो पहलु मन के बारे म प्रतिनिधि मंडल ल विस्तार ले जानकारी दीन। उमन कहिन के ये योजना के उद्देश्य गौमाता के संरक्षण अऊ संवर्धन हे। उमन कहिन के ये योजना के तहत गोबर के खरीदी करे जाही। एखर से पशुपालक मन ले लेके किसान मन तक ल लाभ होही। उमन कहिन के गोबर ले वर्मी कम्पोस्ट तियार करे जाही। जऊन ल निरधारित दर म किसान मन ल उपलब्ध कराया जाही। एखर से खेती के उर्वरा शक्ति बाढ़ही अऊ उपज के पौष्टिकता घलोक बेहतर होही। मुख्यमंत्री ह कहिन के जैविक खेती ल बढ़ावा देहे बर जैविक खाद के उत्पादकता बढ़ाना जरूरी हे। गोधन न्याय योजना छत्तीसगढ़ म जैविक खेती ल बढ़ावा देहे म कारगार साबित होही। ये बेरा म रजक समाज के प्रदेश अध्यक्ष श्री किशनलाल निर्मलकर, श्री पंकज निर्मलकर, श्री राजा निर्मलकर, श्री बंशी कन्नौज, श्री हिमांशु कन्नौज संग आन मनखे उपस्थित रहिन।
