निगम-मंडल ल लेके एक पईत फेर आठ दिसंबर के मुख्यमंत्री निवास म बैठक होही
रायपुर, 05 दिसम्बर 2020। प्रदेश कांग्रेस अध्यक्ष मोहन मरकाम काली सुकवार के पार्टी संगठन विस्तार के सूची लेके दिल्ली रवाना होए हें जेमा प्रदेश स्तर ले लेके ब्लाक स्तर के पदाधिकारी मन के नाम हावय। जानबा हे के दिल्ली म आला नेता मन ले मुलाकात अऊ मंथन के बाद पार्टी संगठन के नवा पदाधिकारी मन के नाम तय करे जाही। जानबा इहू हे के कांग्रेस के प्रदेश के आला नेता मन ह मुख्यमंत्री निवास म संगठन विस्तार के संबंध म नाम लगभग तय कर लेहे हें।
एकरे संगेंच बड़का खबर एहू हवय के निगम-मंडल के बांचें पदाधिकारी मन के घोषणा तको इही महीना होवईया हे। जानबा हे के निगम-मंडल के बांचें पदाधिकारी मन के नाम ल लेके एक पईत फेर आठ दिसंबर के मुख्यमंत्री निवास म बैठक होही। ये मां निगम-मंडल के पदाधिकारी मन के नाव ल आखरी रूप दे जाही अऊ उही दिन संझा तक एकर घोषणा तको कर देहे जाही। छत्तीसगढ़ के साहित्य अऊ रचनाधर्मी मनखे मन म ए बात ल लेके उत्सुकता हवय के ए पईत के राजभाषा आयोग के अध्यक्ष कोन होही।
