मुख्यमंत्री ह बिलासपुर म फहराइन तिरंगा
रायपुर, लोकतंत्र के मजबूती, संविधान के सर्वोच्चता अउ विकसित छत्तीसगढ़ के संकल्प के संग 77वां गणतंत्र दिवस पूरा प्रदेश म हर्षोल्लास, देशभक्ति अउ गौरवपूर्ण माहौल म मनाय गीस। मुख्यमंत्री श्री विष्णु देव साय ह बिलासपुर के पुलिस परेड ग्राउंड म आयोजित गणतंत्र दिवस के मुख्य समारोह म राष्ट्रीय ध्वज फहराइन अउ संयुक्त परेड के सलामी लीन। उमन शहीद सैनिक अउ पुलिस जवान मन के परिजन मन ल सम्मानित करिन अउ छत्तीसगढ़ पुलिस बल ल राज्य स्थापना के 25वां सालगिरह के पदक देय के घोषणा करिन।
मुख्यमंत्री श्री साय ह ए मौका म प्रदेशवासी मन ल गणतंत्र दिवस के बधाई देवत कहिन के भारत के संविधान हमर लोकतांत्रिक आस्था, समानता अउ सामाजिक न्याय के मजबूत आधार हे। छत्तीसगढ़ महतारी के सेवा, विकास अउ समृद्धि बर राज्य सरकार पूरा निष्ठा के संग काम करत हे। मुख्यमंत्री श्री साय ह अपन गणतंत्र दिवस संदेश म राज्य के उपलब्धि, जनकल्याणकारी योजना, नक्सल उन्मूलन के दिशा म होय प्रगति, किसान-मजदूर-महिला मन के सशक्तीकरण, शिक्षा-स्वास्थ्य-औद्योगिक विकास अउ सुशासन के विस्तार ले जानकारी दीन।
मुख्यमंत्री ह कहिन के गणतंत्र दिवस सिरिफ तिहार के दिन नो हे, भलुक देश बर बलिदान देवइया महापुरुष अउ स्वतंत्रता संग्राम सेनानी मन ल सुरता करे के दिन घलो हे। उमन संविधान निर्माता, खास करके बाबा साहेब डॉ. भीमराव अंबेडकर ल नमन करत कहिन के संविधान सामाजिक समरसता, समान अधिकार अउ अभिव्यक्ति के आजादी के प्रतीक हे। उमन बाबा गुरु घासीदास जी के “मनखे-मनखे एक समान” के संदेश ल संविधान के आत्मा बताइन अउ कहिन के भारतीय गणतंत्र ह अइसन खुला समाज बनाय हे, जिहां हर नागरिक राष्ट्र निर्माण म भागीदार बन सकत हे।
मुख्यमंत्री श्री साय ह कहिन के छत्तीसगढ़ ह हाल म राज्य स्थापना के रजत जयंती मनाय हे। पूर्व प्रधानमंत्री भारत रत्न श्रद्धेय अटल बिहारी वाजपेयी जी के बनाय ए राज्य ह 25 बछर म विकास के मजबूत जातरा तय करे हे। उमन बताइन के संविधान के मंदिर – छत्तीसगढ़ विधानसभा के नवा बने भवन के लोकार्पण प्रधानमंत्री श्री नरेंद्र मोदी जी के करकमल ले पूरा होइस। धान के बाली के डिजाइन अउ बस्तर-सरगुजा के लोककला ले सजे ए भवन छत्तीसगढ़ी अस्मिता के प्रतीक हे।
मुख्यमंत्री ह कहिन के ए बछर राष्ट्रगीत वंदे मातरम् के 150वां जयंती राज्यभर म श्रद्धा अउ सम्मान के संग मनाय गीस। सुकमा जिला के कोंटा ले लेके मनेंद्रगढ़-चिरमिरी-भरतपुर के सीतामढ़ी हरचौका तक लोगन मन ह सामूहिक रूप ले वंदे मातरम् के गायन करिन। ए ह बंकिम चंद्र चट्टोपाध्याय ल सच्चा श्रद्धांजलि हे।
मुख्यमंत्री ह धरती आबा भगवान बिरसा मुंडा के 150वां जयंती अउ आदिवासी गौरव दिवस के आयोजन के जिक्र करत कहिन के आदिवासी समाज ह स्वतंत्रता संग्राम म ऐतिहासिक योगदान दे हे। उमन बताइन के प्रधानमंत्री श्री नरेंद्र मोदी जी के द्वारा लोकार्पित शहीद बीर नारायण सिंह आदिवासी स्वतंत्रता संग्राम सेनानी डिजिटल संग्रहालय देश के पहिली डिजिटल संग्रहालय हे, जेन आज के पीढ़ी ल आदिवासी नायक मन के बलिदान ले परिचित कराथे।
मुख्यमंत्री श्री साय ह कहिन के माओवादी हिंसा लोकतंत्र बर गंभीर चुनौती रिहिस, फेर प्रधानमंत्री श्री नरेंद्र मोदी जी के नेतृत्व अउ केंद्रीय गृह मंत्री श्री अमित शाह जी के मार्गदर्शन म छत्तीसगढ़ ह निर्णायक रणनीति अपनाय हे। उमन बताइन के जवान मन के अदम्य साहस अउ लगातार अभियान के फल हे के माओवादी हिंसा अब आखिरी चरण म हे अउ मार्च 2026 तक प्रदेश ल नक्सलमुक्त करे के लक्ष्य पूरा होवइया हे। मुख्यमंत्री ह आत्मसमर्पित नक्सली मन के पुनर्वास, बस्तर कैफे जइसे पहल अउ नियद नेल्ला नार योजना के माध्यम ले प्रभावित क्षेत्र मन म विकास काम के जानकारी दीन।
मुख्यमंत्री ह कहिन के राज्य बने के बाद सबले बड़े चुनौती अन्नदाता के समृद्धि रिहिस। आज छत्तीसगढ़ के किसान ल धान के देश म सबले जादा कीमत मिलत हे। उमन बताइन के धान खरीदी 5 लाख मीट्रिक टन ले बाढ़के 149 लाख मीट्रिक टन तक पहुंच गे हे। पाछू दू बछर म किसान मन के खाता म डेढ़ लाख करोड़ रूपिया अंतरित करे गे हे। अटल सिंचाई योजना के तहत 115 लटके सिंचाई परियोजना मन ल पूरा करे जावत हे।
मुख्यमंत्री ह बताइन के प्रधानमंत्री आवास योजना के तहत प्रदेश म 26 लाख ले जादा आवास स्वीकृत करे गे हे अउ हर दिन अंदाजन 2 हजार आवास बनत हे, जेन देश म सबले जादा हे। उमन कहिन के राज्य बिजली उत्पादन म देश म दूसरा नंबर म हे अउ जल्दीच पहिली नंबर कोती बढ़त हे। सौर ऊर्जा, गैस आधारित परियोजना अउ शून्य कार्बन उत्सर्जन लक्ष्य ऊपर तेजी ले काम होवत हे।
मुख्यमंत्री ह महतारी वंदन योजना के तहत 70 लाख महिला मन ल हर महीना 1,000 रूपिया के सम्मान राशि देय के जानकारी दीन। अब तक 14,948 करोड़ रूपिया के राशि बांट देहे गे हे। उमन मजदूर मन बर ईएसआई, श्रम संहिता अउ सामाजिक सुरक्षा योजना मन के सही ढंग ले लागू करे के बात कहिन।
मुख्यमंत्री ह बताइन के युक्तियुक्तकरण ले शिक्षक मन के कमी दूर करे गे हे। राष्ट्रीय शिक्षा नीति के तहत स्थानीय भाखा म शिक्षा, 9 हजार स्मार्ट क्लास अउ 22 हजार कंप्यूटर के व्यवस्था करे जात हे। स्वास्थ्य शिक्षा के क्षेत्र म नवा मेडिकल कालेज मन के स्वीकृति ले अब एकर संख्या बाढ़के 15 हो गे हे। बिलासपुर म मल्टी सुपर स्पेशलिटी हॉस्पिटल अउ हिंदी म एमबीबीएस के पढ़ाई शुरू करे गे हे।
मुख्यमंत्री ह कहिन के नवा औद्योगिक नीति के तहत अब तक 7.83 लाख करोड़ रूपिया के निवेश प्रस्ताव मिले हे। नवा रायपुर ल आईटी, एआई, फार्मा अउ मेडिकल हब के रूप म विकसित करे जात हे। उमन कहिन के भविष्य एआई (AI) के हे अउ छत्तीसगढ़ एकर धुरी बनही।
मुख्यमंत्री ह रामलला दर्शन योजना, मुख्यमंत्री तीर्थ दर्शन योजना, बस्तर पंडुम, चित्रकोट जलप्रपात, मैनपाट, सरगुजा अउ जशपुर पर्यटन के विकास के जिक्र करिन। उमन ई-ऑफिस, जेम पोर्टल, बायोमेट्रिक अटेंडेंस अउ डिजिटल गवर्नेंस के माध्यम ले सुशासन के मजबूती ऊपर जोर दिन।
समारोह म स्कूली लइका मन कोती ले राष्ट्रभक्ति ले भरे सांस्कृतिक कार्यक्रम प्रस्तुत करे गीस। अलग-अलग सरकारी विभाग मन कोती ले योजना मन ऊपर आधारित आकर्षक झांकी निकाले गीस, जेन ह प्रदेश के विकास जातरा ल जीवंत रूप म देखाइस।
विकसित छत्तीसगढ़ के आह्वान
मुख्यमंत्री ह स्व. लक्ष्मण मस्तूरिया जी के कविता के पंक्ति मन के माध्यम ले जनभागीदारी के आह्वान करत कहिन के विकसित छत्तीसगढ़ के निर्माण म सबो के सहभागिता जरूरी हे। उमन आखिरी म प्रदेशवासी मन ल गणतंत्र दिवस के बधाई अउ शुभकामना दीन।