मुख्यमंत्री सामिल होइन साहू समाज के शपथ ग्रहण समारोह म
रायपुर, मुख्यमंत्री श्री भूपेश बघेल कहिन हे कि नवा छत्तीसगढ़ के नवनिर्माण म सबो समाज के सक्रिय भागीदारी अऊ भूमिका जरूरी हे। हम सब मिलके राज्य ल समृद्ध अऊ खुशहाल बनाबो। मुख्यमंत्री आज रायपुर के टिकरापारा स्थित साहू सदन म आयोजित साहू समाज के नवनिर्वाचित पदाधिकारी मन के शपथ ग्रहण समारोह ल संबोधित करत रहिन। मुख्यमंत्री ह समारोह म सुराजी गांव योजना म गांव मन म गौठान मन के विकास, कुपोषण के खिलाफ लड़ाई अऊ गुणवत्तापूर्ण शिक्षा बर सबो मनखे मन ले सक्रिय योगदान के आव्हान करिन। उमन कहिन कि साहू समाज के घलोक प्रदेश स्तर ले लेके ग्राम स्तर तक मजबूत संगठन हे। ए महत्वपूर्ण योजना मन ल सफल बनाए म साहू समाज अपन महत्वपूर्ण योगदान दे सकत हे।
मुख्यमंत्री ह समारोह म साहू समाज के नवनिर्वाचित अध्यक्ष श्री अर्जुन हिरवानी, उपाध्यक्ष श्री तुलसी साहू अऊ श्रीमती सरिता साहू संग नवनिर्वाचित पदाधिकारी मन ल शपथ देवाइन। उमन नवनिर्वाचित पदाधिकारी मन ल बधाई अऊ शुभकामना दीन। समारोह के अध्यक्षता गृह अऊ लोक निर्माण मंत्री श्री ताम्रध्वज साहू ह करिन। विधायक श्री धनेन्द्र साहू, श्रीमती छन्नी साहू, पूर्व मंत्री श्री कृपाराम साहू, पूर्व सांसद श्री चन्दूलाल साहू विशेष अतिथि के रूप म समारोह म उपस्थित रहिन।