- स्वास्थ्य मंत्री श्री सिंहदेव ह केन्द्रीय स्वास्थ्य मंत्री ल कोविड—19 के नियंत्रण के व्यवस्था के दीन जानकारी
- स्वास्थ्य मंत्रालय के वीडियो कॉन्फ्रेंस म सामिल होइन श्री सिंहदेव
रायपुर, 24 अपरेल 2020। छत्तीसगढ़ ह कोरोना वायरस के संक्रमण के रोकथाम बर केन्द्रीय स्वास्थ्य मंत्रालय ले 50 हजार एन-95 मास्क, 20 हजार वीटीएम (Viral Transport Media) किट अऊ 250 वेंटीलेटर्स उपलब्ध कराए के मांग करे हे। सी.आर.पी.एफ. के बनाए ट्रिपल लेयर मास्क के खरीदी बर प्रदेश बर कोटा निरधारित करे के आग्रह घलोक करे गीस। स्वास्थ्य मंत्री श्री टी.एस. सिंहदेव ह आज केन्द्रीय स्वास्थ्य मंत्री डॉ. हर्षवर्धन के वीडियो कॉन्फ्रेंस म कोविड-19 ले निपटे बर प्रदेश के तात्कालिक जरूरत मन के बारे म अपन मांग साझा करिन। स्वास्थ्य मंत्रालय ह वीडियो कॉन्फ्रेंस ले सबो राज्य के स्वास्थ्य मंत्री ले चर्चा करके देश म कोविड-19 के स्थिति के समीक्षा करिन। स्वास्थ्य राज्य मंत्री श्री अश्वनी कुमार चौबे अऊ स्वास्थ्य मंत्रालय के सचिव सुश्री प्रीति सूदन घलोक वीडियो कॉन्फ्रेंस म मौजूद रहिन।
स्वास्थ्य मंत्री श्री सिंहदेव ह वीडियो कॉन्फ्रेंस म कोरोना वायरस संक्रमण के रोकथाम बर प्रदेश म करे गए व्यवस्था मन के विस्तार ले जानकारी दीन। उमन बताइन के प्रदेश भर के अलग-अलग अस्पताल मन म 5,666 बिस्तर म इलाज के व्यवस्था करे जात हे। आईसीयू अऊ सेमी-आईसीयू के संगेच अस्पताल मन म 622 वेंटिलेटर्स के व्यवस्था हे। एखर ले अकतहा 300 चाइल्ड-वेंटिलेटर घलोक उपलब्ध हे। प्रदेश तीर हाइड्रॉक्सीक्लोरोक्वीन के आठ लाख 20 हजार गोली के स्टॉक हे। उमन जानकारी दीन के जरूरत परे म अधिग्रहण बर निजी अस्पताल के घलोक चिन्हारी कर लेहे गे हे। आपात स्थिति म आइसोलेशन सुविधा के विस्तार बर कमरा मन के संग अटैच्ड टॉयलेट वाले छात्रावास के चिन्हारी करे के घलोक हुकुम देहे गे हे।
श्री सिंहदेव ह केन्द्रीय स्वास्थ्य मंत्री ल बताइस के पूल टेस्टिंग अऊ आर.डी. किट सर्विलांस के माध्यम ले जादा ले जादा संदिग्ध मन के जांच करे जात हे। अब तक कुल दस हजार 346 संभावित मनखे के सैंपल सकेल के जांच करे गए हे। एमां ले 9,206 सैंपल के रिपोट निगेटिव आए हे जबकि 1104 सैंपल के जांच चलत हे। अब तक इहां कुल 36 पाजिटिव मामला आए हे जेमा ले 30 मरीज इलाज के बाद पूरा स्वस्थ होके घर चल देहें हे। 6 मनखे के उपचार जारी हे। उमन बताइन के स्वास्थ्य विभाग ह संभावित क्षेत्र मन म घर-घर जाके एक्टिव सर्विलांस करत हे। लॉक-डाउन संग भारत सरकार के सबो दिशा-निर्देश के पालन सुनिश्चित कराए जात हे।
स्वास्थ्य मंत्री ह कोविड-19 के जांच बर प्रदेश के लैबोटरीज मन ल अपडेट करे बर जरूरी मशीन मन के आईसीएमआर ले अनुमोदित कीमत उपलब्ध कराए के आग्रह करिन। एखर से राज्य सरकार तेजी ले जरूरी मशीन मन के खरीदी करके लैब के उन्नयन कर सकही। वीडियो कॉन्फ्रेंस म स्वास्थ्य विभाग के सचिव श्रीमती निहारिका बारिक सिंह अऊ आयुक्त श्री भुवनेश यादव घलोक सामिल होइन।
