रायपुर, मुख्यमंत्री श्री भूपेश बघेल ले आज संझा ऊंखर निवास कार्यालय म छत्तीसगढ़ प्रदेश लिपिक वर्गीय कर्मचारी संघ, छत्तीसगढ़ लघु वेतन कर्मचारी संघ अऊ छत्तीसगढ़ सहायक पशु चिकित्सा क्षेत्र अधिकारी संघ के प्रतिनिधिमंडल ह सौजन्य मुलाकात करिस। प्रतिनिधिमंडल ह शासकीय अधिकारी-कर्मचारी मन ल 6% महंगाई भत्ता देहे म मुख्यमंत्री के आभार जतात फुल के गुच्छा भेंट करके ओ मन ल धन्यवाद ज्ञापित करिन।
कर्मचारी संगठन के प्रतिनिधिमंडल ह मुख्यमंत्री ले कहिन कि छत्तीसगढ़ सरकार कोति ले सरलग शासकीय कर्मचारी मन के हित म निर्णय लेहे जात हे। जुन्ना पेंशन योजना लागू करे ले कर्मचारी मन के भविष्य सुरक्षित होए हे। ओ मन सेवानिवृत्ति के बाद घलोक आर्थिक रूप ले आत्मनिर्भर जीवन व्यतीत कर पाहीं। उमन कहिन कि शासकीय कर्मचारी मन के मांग म 6 प्रतिशत महंगाई भत्ता देहे ले कर्मचारी मन के आर्थिक चिंता दूर हो गए हे। ये बेरा म छत्तीसगढ़ प्रदेश लिपिक वर्गीय कर्मचारी संघ के प्रांताध्यक्ष श्री रोहित तिवारी संग श्री योगेश्वर भारती, श्री जितेंद्र सिंह, श्री सुनील यादव, श्री हेमंत बघेल, श्री आकाश तिवारी अऊ श्री अयूब खान अऊ लघु वेतन कर्मचारी संघ के प्रांताध्यक्ष श्री पी आर साहू संग श्री रविंद्र यादव, श्री गुलाब ध्रुव अऊ छत्तीसगढ़ सहायक पशु चिकित्सा क्षेत्र अधिकारी संघ के प्रांतीय अध्यक्ष श्री डी.एस. भारद्वाज, श्री आदित्य मिश्रा, श्री हेमंत चंद्राकर अऊ आन पदाधिकारी उपस्थित रहिन।
