मंत्री श्रीमती भेंड़िया अऊ आयोग के अध्यक्ष श्रीमती नेताम ह दीन बधाई
रायपुर, छत्तीसगढ़ राज्य बाल अधिकार संरक्षण आयोग म आज 22 मार्च के नव नियुक्त 5 सदस्य मन पदभार ग्रहण करिन। एमां रायपुर जिला के तिल्दा के श्रीमती आशा संतोष यादव, जांजगीर जिला के पामगढ़ के श्रीमती पुष्पा पाटले, बिलासपुर जिला के श्रीमती पूजा खनुजा, रायपुर जिला के श्री ऑगस्टिन बर्नाड अऊ दुर्ग जिला के श्री सोनल कुमार गुप्ता सामिल हे। ये बेरा म महिला अउ बाल विकास मंत्री श्रीमती अनिला भेंड़िया, आयोग के अध्यक्ष श्रीमती तेजकुंवर नेताम अऊ गणमान्य नागरिक उपस्थित रहिन।
जानबा हे कि महिला अउ बाल विकास विभाग ह 9 मार्च के अधिसूचना के माध्यम ले 5 सदस्य मन ल आयोग म 3 साल बर नियुक्त करे रहिस। पदभार ग्रहण के बाद श्रीमती भेंड़िया ह आयोग के नव-नियुक्त सदस्य मन ल बधाई अऊ शुभकामना दीन। उमन आशा व्यक्त करिन कि नव-नियुक्त सदस्य लइका मन के अधिकार के रक्षा बर जिम्मेदारी के संग काम करहीं। श्रीमती तेजकुंवर नेताम ह आयोग के नवा सदस्य मन ल बधाई अऊ शुभकामना देवत जल्दी अऊ ठोस कार्यवाही करे बर मार्गदर्शन दीन। उमन कहिन कि आयोग लइका मन के अधिकार के संरक्षण ले जुड़े हे, ते पाए के मामला मन म संवेदनशीलता ले काम लेवव। ये बेरा म सबो नवनियुक्त सदस्य मन ह एकजुट होके लइका मन ल संरक्षण अऊ राहत बर काम करे के संकल्प प्रदर्शित करिन।
