छत्तीसगढ़ राज्य स्थापना दिवस म विदेश म रहत छत्तीसगढ़िया मन ह अपन मातृभूमि के करिन सुरता

रायपुर, छत्तीसगढ़ के 21वां राज्य स्थापना दिवस 01 नवंबर के अवसर म एनआरआई समुदाय-नाचा (उत्तरी अमेरिका छत्तीसगढ़ एसोसिएशन) ह अमेरिका ले वैश्विक स्तर म एक भव्य वर्चुअल आयोजन करिस। ये वर्चुअल आयोजन म छत्तीसगढ़ के संस्कृति, भाखा अऊ साहित्य ले देश-दुनिया के परिचय करात कई कार्यक्रम प्रस्तुत करे गीस, जेमां यूएसए, कनाडा, ऑस्ट्रेलिया यूरोप, भारत अऊ सिंगापुर ले मनखे मन ह भाग लीन।
एकर लाइव प्रसारण नाचा के सोशल मीडिया चौनल म करे गीस। कार्यक्रम म अमेरिकन राजनीतिज्ञ श्री डेनिस डेविस ह छत्तीसगढ़ राज्य स्थापना दिवस के बधाई दीस अऊ अमेरिका म रहत छत्तीसगढ़ के मनखे मन के काम के सराहना करिन। ये साल भारत के 75वां आजादी के अमृत महोत्सव होए सेती नाचा ह छत्तीसगढ़ के स्वतंत्रता सेनानी मन ल अऊ ऊंखर योगदान के सुरता करत अपन श्रद्धांजलि अर्पित करिन। पद्मश्री श्रीमती ममता चंद्राकर घलोक कार्यक्रम ले जुडि़न अऊ छत्तीसगढ़ी म गीत के प्रस्तुति दीन। वर्चुअल आयोजन म विदेश म रहत छत्तीसगढ़िया मन ह अपन मातृभूमि के सुरता करिन अऊ अपन अनुभव साझा करिन।
रोमानिया म भारत के राजदूत श्री राहुल श्रीवास्तव जेमन खैरागढ़ के आंए, उमन छत्तीसगढ़ के सुरता ल साझा करत कहिन कि छत्तीसगढ़ के खानपान, संस्कृति अनूठा होए के संग इहां पर्यटन के बहुत जादा संभावना हे जेला दुनिया ल बताना चाही। बलौदाबाजार के प्रसिद्ध मास्टर शेफ श्री विजय शर्मा ह अपन माटी के खुशबू के सुरता करत कहिस कि ओ ह देश विदेश जिहां जाथे, छत्तीसगढ़ के जायका अऊ ओखर खुशबू संग जाथे। अइसनहे विदेश म रहत मनखे मन ह कई ठन प्रस्तुति मन के माध्यम ले छत्तीसगढ़ के माटी के महक ल दूर दूर तक पहुंचाइन।