रायपुर, छत्तीसगढ़ के सरकारी कर्मचारी मन बर सरकार ह एक बड़का अउ सुग्घर फैसला लेहे हे। अब राज्य के जतका नियमित कर्मचारी हें, ओमन ला भारतीय स्टेट बैंक (SBI) कोती ले करोड़ों रूपिया के बीमा कवर मिलही, अउ एखर बर ओमन ला एको रूपिया प्रीमियम नई भरे बर परय।
का-का सुविधा मिलही: कहूं कोनो कर्मचारी के तनखा (Salary) एसबीआई के खाता म आथे, त ओला ए योजना के लाभ मिलही। उदुपहा कोनो दुर्घटना होय म 1 करोड़ रूपिया अउ हवाई दुर्घटना म 1.60 करोड़ रूपिया के बीमा मिलही। कहूं कोनो कर्मचारी अपंग (दिव्यांग) हो जाथे, त ओला घलो 1 करोड़ रूपिया तक के मदद मिलही। एखर संगेच 10 लाख रूपिया के जीवन बीमा घलो मुफत म दे जाही।
मुख्यमंत्री विष्णु देव साय ह कहिन के हमर सरकार ह कर्मचारी मन के सुख-दुख के सुध लेवत हे। वित्त मंत्री ओ.पी. चौधरी ह बताइन के बिना कोनो खरचा के अतका बड़े बीमा मिलना कर्मचारी हित म एक बड़का कदम ए। ए समझौता ले अब कर्मचारी अउ ओखर परिवार के भविष्य ह अउ जादा सुरक्षित हो जाही।
