लीगल एड क्लिनिक बस मन ल हरियर झंडी देखाइस कार्यवाहक चीफ जस्टिस श्री प्रशांत कुमार मिश्रा ह
बिलासपुर, राष्ट्रीय विधिक सेवा प्राधिकरण के दिशा निर्देश म छत्तीसगढ़ राज्य विधिक सेवा प्राधिकरण ह 17 सितंबर ले प्रदेश भर म न्याय जनता के दुवार अभियान चालू करे हे। ये अभियान के शुरूआत करत दू लीगल एड क्लिनिक बस मन ल आज छत्तीसगढ़ हाईकोर्ट परिसर म कार्यवाहक मुख्य न्यायाधीश जस्टिस श्री प्रशांत कुमार मिश्रा अऊ हाईकोर्ट के सबो जज मन ह हरियर झड़ी देखाके रवाना करिन। ये वैन राज्य के सबो जिला मन म दूरस्थ अंचल मन म पहुंचही अऊ मनखे मन ल न्याय बर जागरूक करही।
ये बेरा म जस्टिस श्री मिश्रा ह अभियान के उद्देश्य उपर प्रकाश डालत बताइन के भारत सरकार के न्याय विभाग कोति ले आज ले ये विशेष अभियान चलाय जाथे। एकर उद्देश्य गांव गांव तक दूरस्थ क्षेत्र म न्याय के प्रति मनखे मन म जागरूकता लाना अऊ अपन अधिकार के प्रति ओ मन ल सचेत करना हे। शॉर्ट फिल्म के माध्यम ले अशिक्षित मनखे मन ल घलोक न्याय के बारे म अऊ विधिक क्षेत्र के बारे म जानकारी देहे जाही ताकि ओ मन अपन अधिकार मन के प्रति सजग होके न्याय पाय बर खुद न्यायालय मन म जावयं अऊ दूसर मन ल घलोक प्रेरित करयं, ओ मन कोनो प्रकार के दमन, अत्याचार के विरूद्ध अवाज उठाके देश ल मजबूत करयं।
जाबा हे के हाईकोर्ट परिसर के संगे-संग हर जिला म घलोक एक-एक लीगल एड क्लिनिक बस रवाना करे गए हे जे ह करीबन 100 गांव तक पहुचही। ये बेरा म जस्टिस मुनीन्द्र मोहन श्रीवास्तव, जस्टिस गौतम भादुड़ी, जस्टिस संजय के अग्रवाल, जस्टिस पी. सेम कोशी, जस्टिस आर.से. एस सामंत, जस्टिस पी.पी. साहू, जस्टिस श्रीमती विमला सिंह कपूर, जस्टिस एन.के. व्यास अऊ जस्टिस एन.के. चंद्रवशी, हाईकोर्ट के रजिस्टार जनरल श्री दीपक तिवारी, राज्य विधिक सेवा प्राधिकरण के सदस्य सचिव श्री सिद्धार्थ अग्रवाल अऊ रजिस्ट्री के आन अधिकारी उपस्थित रहिन।
