बिलासपुर, बिलासपुर म 23 ले 25 दिसंबर तक राज्य युवा महोत्सव के बड़ सुग्घर आयोजन होवत हे। मुख्यमंत्री विष्णु देव साय ह एखर उद्घाटन करहीं। ए मेला म हमर प्रदेश के कोना-कोना ले 3000 युवा मन अपन कला अउ हुनर देखाय बर बहतराई स्टेडियम म जुटहीं।
ए महोत्सव म हमर छत्तीसगढ़ी संस्कृति के रंग घलो दिखही। पंथी, राउत नाचा, सुआ अउ करमा नाच के संग-संग कविता, चित्रकला अउ साइंस मेला घलो होही। दलीय खेल म जीतइया टीम ला 20 हजार अउ अकेला जीतइया मन ला 5 हजार रूपिया के इनाम मिलही। अउ सबले बड़का बात ये हे के ए महोत्सव म जीतइया लइका मन दिल्ली म होवइया ‘राष्ट्रीय युवा उत्सव-2026’ म छत्तीसगढ़ के मान बढ़ाहीं।
ये कार्यक्रम म मनोरंजन बर घलो जबर तैयारी हे। 23 दिसंबर के रात कुमार बिस्वास के कविता होही, अनुज शर्मा के आरूग बैंड अउ आरू साहू के गाना के घलो आनंद मनखे मन ला मिलही। ए कार्यक्रम म पहली पइत ‘खेलो इंडिया ट्राइबल गेम्स’ के घलो सुरुवात करे जाही।
बिलासपुर म लगही 3000 युवा मन के मेला: राज्य युवा महोत्सव अउ ‘खेलो इंडिया ट्राइबल गेम्स’ के होही आगाज
