राज सरकार युवा मन ल सिच्छा, रोजगार अउ खेल समेत हर जगा म आगू बढ़ाय बर बाना उंचाए हे।
बिलासपुर म तीन दिन के छत्तीसगढ़ राज युवा महाउतसव के भब्य सुभारंभ।
खेलो इंडिया ट्राइबल गेम्स छत्तीसगढ़-2026 के सुभंकर ‘मोर वीर’, थीम सॉन्ग अउ खेलो इंडिया टॉर्च के अनावरण।
मलखंब खिलाड़ी मन ल एक लाख रूपिया प्रोत्साहन रासि समेत कतको महत्वपूर्ण घोसन होइस।
रायपुर Gurtur Goth Chhattisgarhi News, छत्तीसगढ़ के युवा मन के गुन, उर्जा अउ सिर्जनसील ताकत ल देस म चिन्हारी देवाए के उदेस ले आयोजित राज स्तरीय युवा महाउतसव के आज बिलासपुर के बहतराई स्टेडियम म भब्य सुभारंभ होइस। मुख्यमंत्री श्री विष्णु देव साय ह तीन दिन के ए महाउतसव के उद्घाटन करत खेलो इंडिया ट्राइबल गेम्स छत्तीसगढ़-2026 के सुभंकर ‘मोर वीर’, थीम सॉन्ग अउ खेलो इंडिया टॉर्च के रिमोट बटन दबा के अनावरण करिन।
मुख्यमंत्री श्री साय ह युवा मन के प्रेरणास्रोत स्वामी विवेकानंद के मूरती म फूल चढ़ा के नमन करिन। उद्घाटन म अबूझमाड़ के खिलाड़ी मन ह मलखंब के गजब परदरसन करिन। महिला कबड्डी खिलाड़ी संजू देवी अउ एथलेटिक्स खिलाड़ी श्री अमित कुमार ह खेलो इंडिया टॉर्च के अनावरण करिन।
मुख्यमंत्री श्री साय ह युवा मन ल संबोधित करत कहिन के युवा मन ही देस अउ प्रदेश के भविस हें। राज सरकार सिच्छा, रोजगार, कउसल विकास अउ खेल समेत हर जगा म युवा मन ल आगू बढ़ाय बर पूरा ताकत ले काम करत हे। ए युवा महाउतसव ह सिरिफ युवा मन के गुन ल चिन्हारी देय के मंच नो हे, बल्कि ओ मन ल देस के स्तर तक पहुँचाय के बड़का माध्यम घलो आय।
मुख्यमंत्री ह ए मउका म खेलो इंडिया म बढ़िया खेलइया मन ल प्रोत्साहन रासि दीन, मलखंब खिलाड़ी मन ल एक लाख रूपिया के बिसेस प्रोत्साहन रासि देइन अउ ‘अमेरिका गॉट टैलेंट’ म चुने गए मलखंब खिलाड़ी अनतई पोटाई के अमेरिका आय-जाय के पूरा खरचा राज सरकार कोति ले उठाय के घोसन करिन। उमन कहिन के ए युवा महाउतसव म पूरा प्रदेश ले 3,000 ले जादा युवा मन सामिल होवत हें, जेमन 14 विधा मन म अपन गुन देखाहीं। लोकनृत्य, लोकगीत, वाद-विवाद, चित्रकला अउ कविता लेखन के विजेता मन साल 2026 म नई दिल्ली म होवइया रास्ट्रीय युवा उत्सव म छत्तीसगढ़ के मान बढ़ाहीं।
मुख्यमंत्री श्री साय ह कहिन के बस्तर ओलंपिक म 1 लाख 65 हजार ले जादा युवा मन के सामिल होना ए बात के परमान हे के छत्तीसगढ़ ह नक्सलवाद ले मुक्त हो के सांति, विकास अउ सकारात्मक बदलाव कोति तेजी ले आगू बढ़त हे।
