- छत्तीसगढ़ म कोरोना टेस्टिंग के नवा रिकार्ड: एक दिन म 71 हजार ले जादा जांच
- 01 मई के बाद सरलग सुधरत हे स्थिति
- सुविधा मन म विस्तार ले टेस्ट अऊ टीकाकरण म आईस तेजी
- अस्पताल मन म सबो प्रकार के बेड के उपलब्धता घलोक बाढ़ीस
- रोजेच होवईया मृत्यु के आंकड़ा म घलोक कमी
- पाजिटिविटी दर अऊ नीचे उतर के 14 प्रतिशत रहि गे
रायपुर, 13 मई 2021। छत्तीसगढ़ म 01 मई 2021 के बाद कोरोना संक्रमण के स्थिति म सरलग सुधार होवत हे। तब ले लेके अब तक जिहां रोजेच नवा मामला म कमी आए हे, उहें संक्रमण दर घलोक सरलग घटत हे। ए 12 दिन म पाजिटिविटी दर 26.1 ले घट के अब 14 प्रतिशत रहि गए हे।
अस्पताल मन म सबो प्रकार के बिस्तर अऊ आक्सीजन के उपलब्धता बढ़े के संगें-संग रोजेच होवईया मृत्यु म घलोक कमी आवत हे। ये बीच टेस्ट अऊ टीकाकरण म घलोक तेजी आए हे। राज्य ह रोजेच होवत टेस्ट म नवा रिकार्ड कायम करे हे। 12 मई के एक दिन म 71 हजार 138 टेस्ट करे गए हे।
छत्तीसगढ़ म बीते 1 मई के जिहां कोरोना संक्रमण के 15 हजार 905 नवा मामला आगू आए रहिस, उहें 12 मई के 10 हजार 150 नवा मामला दर्ज करे गीस। अइसनहे रोजेच होवइया मृत्यु के आंकड़ा जिहां 01 मई के 229 रहिस, उहें 12 मई के 153 मनखे मन के मृत्यु होइस। 12 दिन पहिली तक राज्य के अस्पताल मन म जिहां खाली बेड उपलब्ध नइ हो पात रहिस, उहें कल 12 मई के स्थिति म 318 वेन्टीलेटर बेड, 852 आई.सी.यू. बेड, 750 एच.उी.यू. बेड, 6364 ऑक्सीजन बेड अऊ 11,883 आन बेड उपलब्ध रहिस। राज्य म शुरु ले आक्सीजन के कमी नइ रहे हे। सुविधा मन म होवत विस्तार के सेती अब संभावित कोरोना संक्रमित मन के रोजेच जांच के आंकड़ा घलोक बाढ़े हे। 12 मई के राज्य ह 71 हजार 138 मनखे मन के जांच करके नवा रिकार्ड कायम करे हे।
ये बीच टीकाकरण के मुहिम ल व्यवस्थित तरीका ले संचालित करे बर मुख्यमंत्री श्री भूपेश बघेल ह 12 मई ले राज्य म सीजी-टीका वेब पोर्टल के शुरुआत करे हें। ये पोर्टल के शुरुआत होए ले गरीब, निराश्रित अऊ अंत्योदय संग अइसन मनखे घलोक अपन पंजीयन करा सकही, जिंकर मेर मोबाइल या इंटरनेट के सुविधा नइ हे। राज्य के 13 नगर निगम मन म आज 13 मई ले हफ्ता म सातों दिन चैबीसों घंटा रेपिड एंटीजन टेस्ट के सुविधा शुरु कर देहे गए हे। सैंपल मन के आरटीपीसीआर जांच सुविधा मन म होवत विस्तार के तहत बैकुंठपुर म नवा वायरोलाजी लैब के शुरुआत होवईया हे। ये लैब ल मिलाके अब राज्य के दस शासकीय लैब मन म आरटीपीसीआर जांच के सुविधा उपलब्ध हो गे हे। एखर से रोजेच जांच के संख्या म बढ़ोतरी होए के संगें-संग जांच-रिपोर्ट घलोक जल्दी मिले लगही।
