रायपुर, 07 फरवरी, 2024। इंडियन स्पेस रिसर्च ऑर्गेनाईजेशन के एक्सपोजर विजिट ले लहुटे जशपुर के मेघावी लइका मन ह आज छत्तीसगढ़ विधानसभा के कार्यवाही देखिन। ए लइका मन ह मुख्यमंत्री श्री विष्णु देव साय ले घलोक मुलाकात करिन। देश के ख्यातिलब्ध उत्कृष्ट तकनीकी संस्थान मन के भ्रमण करे के बाद लइका मन काफी उत्साहित हें। मुख्यमंत्री श्री साय के निर्देश म आदिवासी बहुल जशपुर जिला के लइका मन ल अत्याधुनिक प्रौद्योगिकी अऊ अंतरिक्ष विज्ञान अउ अनुसंधान के अध्ययन बर प्रोत्साहित करे के उद्देश्य ले इसरो अऊ आईआईटी मद्रास के भ्रमण म भेजे गए रहिस। लइका मन ह अपन अनुभव साझा करत कहिन कि अध्ययन भ्रमण के समय उमन वैज्ञानिक अऊ आईआईटी के छात्र मन ले मुलाकात करिन अऊ कहिन कि हमू उंकर जइसे परीक्षा उत्तीर्ण करके उच्च शिक्षण संस्थान म अध्ययन करके अपन जिला अऊ राज्य के नाम रोशन करबो।
मुख्यमंत्री श्री विष्णुदेव साय ले मुलाकात करके साझा करिन अपन अनुभव
अध्ययन भ्रमण ले लहुटे के बाद जशपुर जिला के 43 मेघावी छात्र-छात्रा मन ह आज छत्तीसगढ़ विधानसभा के भ्रमण करके मुख्यमंत्री श्री विष्णु देव साय ले विधानसभा म मुलाकात करिन। जशपुर जिला के ये छात्र-छात्रा मन स्वामी आत्मानन्द अंगरेजी माध्यम स्कूल पत्थलगांव, बगीचा अऊ जशपुर, संकल्प शिक्षण संस्थान कुनकुरी अऊ जशपुर अउ उच्चतर माध्यमिक कन्या शाला बगीचा के कक्षा 11वीं के छात्र यें।
मुख्यमंत्री श्री साय ह लइका मन ल सम्बोधित करत कहिन कि शैक्षणिक भ्रमण करके आप मन आज इहां विधानसभा के भ्रमण करे आए हव। ए बर आप मन ल बहुत बहुत बधाई। मुख्यमंत्री ह लइका मन ले प्रधानमंत्री श्री नरेंद्र मोदी के परीक्षा म चर्चा कार्यक्रम के बारे म जानकारी लीन। उमन प्रधानमंत्री श्री नरेन्द्र मोदी के लिखे किताब ‘‘एग्जाम वारियर्स‘‘ के बारे म पूछीन। ए बेरा म मुख्यमंत्री श्री विष्णु देव साय ह घोषणा करिन कि अगले शैक्षणिक सत्र ले 9वी ले 12 वीं तक के पढ़ईया लईका मन ल ‘‘एग्जाम वारियर्स‘‘ किताब के निःशुल्क वितरण करे जाही। मुख्यमंत्री ह लइका मन ले कहिन कि ओ मन लगन अऊ मेहनत के संग परीक्षा के तैयारी म जुटयं अऊ अपन परिवार, स्कूल अऊ प्रदेश के नाम रोशन करयं।
