राष्ट्रपति द्रौपदी मुर्मु ह सराहिन जनजातीय कला, कलाकार होइन भावविभोर
नई दिल्ली, गणतंत्र दिवस के अवसर म कर्तव्य पथ म छत्तीसगढ़ के झांकी म सामिल कलाकार मन ला राष्ट्रपति भवन म राष्ट्रपति श्रीमती द्रौपदी मुर्मु ले भेंट करे के गौरव मिलिस। राष्ट्रपति ले स्नेहपूर्ण भेंट के दौरान कलाकार मन भावविभोर अउ गदगद नजर आइन।
राष्ट्रपति श्रीमती द्रौपदी मुर्मु ह छत्तीसगढ़ के झांकी के तारीफ करत कहिन के झांकी के माध्यम ले देश के समृद्ध जनजातीय परंपरा अउ सांस्कृतिक विरासत के प्रभावशाली प्रदर्शन होय हे। ओ मन कलाकार मन के समर्पण, मेहनत अउ जीवंत प्रस्तुति के सराहना करत ‘छत्तीसगढ़िया सबले बढ़िया’ घलो कहिन।
छत्तीसगढ़ के नारायणपुर जिला ले आए जनजातीय कलाकार मन ह गणतंत्र दिवस परेड के दौरान छत्तीसगढ़ के झांकी के संग पारंपरिक मांदर नाच के मनमोहक प्रस्तुति दे रहिन, जे ह कर्तव्य पथ म मौजूद दर्शक मन के संग-संग देश-दुनिया के ध्यान आकर्षित करिस।
कलाकार मन ह राष्ट्रपति ले भेंट ला अपन जीवन के कभू न भुलाए वाला पल बतावत कहिन के ए सम्मान ओ मन ला अपन कला, संस्कृति अउ परंपरा ला अउ जादा निष्ठा के संग आघु बढ़ाए के नवा प्रेरणा देही।
राष्ट्रपति ले भेंट करइया मन म टीम लीडर तेज बहादुर भुवाल के नेतृत्व म नारायणपुर जिला के ग्राम नयनार ले आए 13 सदस्य वाले दल म जेनू राम सलाम, लच्छू राम, जैतू राम सलाम, राजीम सलाम, दिनेश करंगा, जयनाथ सलाम, मानसिंग करंगा, चन्द्रशेखर पोटाई, धनश्याम सलाम, जगनाथ सलाम, सुरेश सलाम अउ घोड़लापारा, ग्राम नयनार निवासी दिलीप गोटा सामिल रहिन।
जानबा हे के बस्तर अंचल के ए पारंपरिक कला टोली ह अपन लोक-संस्कृति अउ नाच शैली ले राष्ट्रीय मच म छत्तीसगढ़ के विशिष्ट पहिचान ला सशक्त रूप ले प्रस्तुत करिस।