छत्तीसगढ़ ह दुनिया ल बताइस गोबर के कीमत

रायपुर, मुख्यमंत्री श्री भूपेश बघेल शासन के योजना मन के क्रियान्वयन के जानकारी लेहे बर आम मनखे के बीच पहुंचत हें। विधानसभा मन के दौरा के कड़ी म आज चंउथईया दिन मुख्यमंत्री भटगांव विधानसभा क्षेत्र के ग्राम लटोरी पहुंचिन। उहां गांव वाले मन ले भेंट-मुलाकात बर आयोजित जन चौपाल ल संबोधित करत मुख्यमंत्री ह कहिन कि आप मन के बीच आप मन ल सुने बर आए हंव, शासन ह जेन योजना बनाय हे, ओखर क्रियान्वयन के जानकारी लेहे आए हंव। ग्राम करवां ले जन चौपाल म पहुंचे जननू कुशवाहा ह मुख्यमंत्री ल बताइस कि गोधन न्याय योजना के माध्यम ले गोबर बेचके वोखर आय होवत हे अऊ एखर ले पहिली गोबर के कीमत कोनो नइ जानत रहिन, छत्तीसगढ़ ह पूरा दुनिया ल गोबर के महत्व बता देहे हे। देश के कई राज्य मन म गोबर खरीदी प्रक्रिया शुरू होवत हे।