छत्तीसगढ़ पर्यटन ह कोलकाता म दीस अपन दमदार हाजिरी

रायपुर/ मुख्यमंत्री श्री विष्णु देव साय कोति ले राज्य म पर्यटन ल बढ़ावा देहे के उदीम मन म काली एक बड़का कड़ी जुड़े हे। कोलकाता म चलत ट्रैवल एंड टूरिज्म फेयर (travel and tourism fair) म छत्तीसगढ़ टूरिज्म बोर्ड ह अपन विशिष्ट अऊ समृद्ध विरासत के संग शानदार उपस्थिति दर्ज कराए हे। छत्तीसगढ़ टूरिज्म बोर्ड के अध्यक्ष श्री नीलू शर्मा ह कोलकाता के टूर ऑपरेटर अउ ट्रेव्हल्स एजेंट (Tour operators and travel agents in Kolkata) ल छत्तीसगढ़ के टूर पैकेज बर नेवता देहे हे। ए बेरा म छत्तीसगढ़ टूरिज्म बोर्ड (Chhattisgarh Tourism Board) के अध्यक्ष श्री नीलू शर्मा ह जम्मू-कश्मीर के मुख्यमंत्री श्री उमर अब्दुल्ला के संग मंच साझा करिन।
ए बेरा म अध्यक्ष श्री नीलू शर्मा ह कहिन के ये हमार खातिर गौरव के बात हे के छत्तीसगढ़ जइसन समृद्ध राज्य ल भारत के ए प्रमुख पर्यटन मंच म पगरइती करे के अवसर मिले हे। हमर राज्य प्राकृतिक सौंदर्य, सांस्कृतिक विरासत, जनजातीय परंपरा, ऐतिहासिक स्थल अऊ आध्यात्मिक ऊर्जा मन ले भरपूर हे। छत्तीसगढ़ ल आजो ‘अनदेखा भारत‘ कहे जाथे अऊ इही एखर सबले बड़े शक्ति ये। उमन छत्तीसगढ़ के प्रमुख पर्यटन स्थल जइसे चित्रकोट जलप्रपात, कांगेर घाटी, सिरपुर, बस्तर के धुड़मारास के संगे-संग भोरमदेव, डोंगरगढ़, दंतेवाड़ा आदि धार्मिक स्थल मन के उल्लेख करिन। उमन पश्चिम बंगाल के टूर ऑपरेटर्स अऊ ट्रैवल एजेंट्स ले आग्रह करिन के ओ मन अपन पर्यटन पैकेज म छत्तीसगढ़ ल घलोक सामिल करंय।
उमन ये घलोक बताइन के छत्तीसगढ़ म पर्यटन ल अब उद्योग के दर्जा प्राप्त हे अऊ पर्यटन क्षेत्र म होमस्टे, रिसॉर्ट्स, ट्राइबल अऊ वेलनेस टूरिज्म (Tribal and Wellness Tourism) ल बढ़ावा देहे बर बहुत अकन योजना चालू करे गए हे। हमर उद्देश्य केवल पर्यटन ल बढ़ावा देना नइ हे, भलुक सांस्कृतिक आदान-प्रदान अऊ सतत विकास ल घलोक मजबूत करना हे। श्री शर्मा ह ये घलोक बताइन के कोलकाता म छत्तीसगढ़ टूरिज्म बोर्ड के स्थायी सूचना केंद्र स्थापित करे गए हे, जेखर से कोलकाता के टूर ऑपरेटर्स अऊ पर्यटक मन ल सीधा अऊ सुविधा-सम्पन्न सेवा प्रदान करे जा सकही। ए मौका म कोलकाता के 50 टूर ऑपरेटर अउ ट्रेव्हल्स एजेंट पंजीकृत होइन।
ए बेरा म छत्तीसगढ़ टूरिज्म बोर्ड के प्रबंध संचालक श्री विवेक आचार्य ह उपस्थित अतिथि, टूर एंड ट्रैवल ऑपरेटर के आगू प्रेजेंटेशन के माध्यम ले छत्तीसगढ़ के सुंदरता, संस्कृति अउ भविष्य के संभावना मन उपर विस्तार ले प्रकाश डालिन संगेच उमन छत्तीसगढ़ शासन कोति ले टूरिज्म ल लेके लेहे गए निर्णय ले घलोक अवगत कराइन।
छत्तीसगढ़ टूरिज्म बोर्ड के अध्यक्ष नीलू शर्मा जी ह मीडिया ले चर्चा म बताइन के भारत ल समझे बर छत्तीसगढ़ ल जानना जरूरी हे। में आप मन सबो ले अनुरोध करत हंव के छत्तीसगढ़ आवव, एला महसूस करव अऊ भारत के आत्मा ले मिलव।
ए बेरा म सिक्किम विधानसभा के उपाध्यक्ष श्रीमती राजकुमारी थापा, मुख्यमंत्री के सलाहकार श्री नासिर असलम वानी, थाईलैंड के महावाणिज्यदूत सुश्री श्रीपोन तांतिपन्याथेप के संग ही वेस्ट बंगाल टूर ऑपरेटर (west bengal tour operators) अउ ट्रेवल एजेंट एसोसिएशन कोलकाता (Travel Agents Association Kolkata) के लगभग 500 ले घलोक जादा सदस्य उपस्थित रहिन।