- मुख्यमंत्री ह छत्तीसगढ़ पर्यटन मण्डल के नवा वेबसाइट लॉन्च करिन
- सिरपुर भ्रमण बर बस सेवा के करिन शुभारंभ
रायपुर, मुख्यमंत्री श्री भूपेश बघेल ह आज बिहनिया इहां अपन निवास कार्यालय म छत्तीसगढ़ पर्यटन मण्डल के नवा वेबसाइट www.tourism.cg.gov.in ल लॉन्च करिन। उमन ये बेरा म अपन निवास ले सिरपुर भ्रमण बर बस सेवा के शुभारम्भ करत पर्यटक बस ल हरियर झंडी देखा के रवाना करिन।
मुख्यमंत्री ह ये बेरा म कहिन कि छत्तीसगढ़ म बहुत अकन सुरम्य प्राकृतिक स्थल अऊ ऐतिहासिक धरोह हे। पर्यटन विभाग के संगें-संग संस्कृति विभाग अऊ ग्रामोद्योग विभाग ल मिलके प्रदेश म पर्यटन ल बढ़ावा देहे के दिशा म काम करे जाही। उमन कहिन कि छत्तीसगढ़ म राम वन गमन मार्ग, माता कौशल्या मंदिर, सिरपुर म बौद्ध स्तूप, बस्तर म चित्रकोट, तीरथगढ़ जलप्रपात, बारसूर म गणेश जी के प्रतिमा, रामगढ़ म प्राचीनतम नाट्यशाला स्थित हे। बस्तर ले सरगुजा तक छत्तीसगढ़ म पर्यटन के अपार संभावना हे।
गृह अऊ पर्यटन मंत्री श्री ताम्रध्वज साहू ह कहिन कि पहिली छत्तीसगढ़ म मोटल बनाय गए रहिस तेमा पर्यटक मन के सुविधा के ध्यान नइ रखे गीस। अब सरकार पर्यटक मन बर सुविधा मन के विस्तार करके पर्यटन ल बढ़ावा देहे के काम करही।
पर्यटन विभाग के ये नवा वेबसाइट म छत्तीसगढ़ राज्य के पयर्टन ले सम्बन्धी सबो जानकारी उपलब्ध हे। ये मां अब पर्यटक मन ल पर्यटन मंडल कोति ले संचालित इकाई रिसोर्ट अऊ मोटल म ऑन लाईन आरक्षण के सुविधा घलोक मिल सकही। पर्यटन मंडल कोति ले मैनपाट, अमरकंटक के कबीर चबूतरा, केंवची तीर आमडोब, सरोदाददर, मोहरा, चित्रकोट, तीरथगढ़ अऊ बालोद म रिसोर्ट के संचालन करे जात हे। पर्यटन मंडल के गंगरेल, मचटोली, सिरपुर अऊ चम्पारण्य के रिसोर्ट निजी क्षेत्र ल संचालन बर देहे गे हे।
मुख्यमंत्री श्री भूपेश बघेल ह ये बेरा म अपन निवास ले सिरपुर भ्रमण बर बस सेवा के शुभारम्भ करत पर्यटक बस ल हरियर झंडी देखाके रवाना करिन। विभाग ले मिले जानकारी के मुताबिक सिरपुर भ्रमण बर बस रोजेच होटल जोहार छत्तीसगढ़ रायपुर ले प्रस्थान करही। पर्यटक भ्रमण म प्रति मनखे ए.सी. बस म बेसिक प्लान राशि रूपिया 600 हे जेमां मंझनिया के जेवन, गाईड अऊ आन शुल्क अउ वाहन संग संझा के चाय तको दिए जाही। ये भ्रमण कार्यक्रम बर जादा जानकारी बर कॉल सेंटर, गढ़हटरी, गुरूघासीदास परिसर रायपुर के टोल फ्री नं. 18001026415 अऊ फोन नं. 0771-4224999 म घलोक संपर्क करे जा सकत हे। ये बेरा म मुख्यमंत्री के सलाहकार श्री प्रदीप शर्मा, पर्यटन विभाग के विशेष सचिव श्री अम्बलगन पी. अऊ छत्तीसगढ़ पर्यटन मंडल के प्रबन्ध संचालक श्रीमती इफ्फत आरा संग पर्यटन मंडल के अधिकारी उपस्थित रहिन।