शाकम्भरी योजना म किसान मन ल मिलत हे 75 प्रतिशत तक अनुदान, 3234 किसान उठाइन फायदा
रायपुर, मुख्यमंत्री श्री विष्णुदेव साय के अगुवइ, कृषि मंत्री श्री रामविचार नेताम के मार्गदर्शन अउ बीज निगम के अध्यक्ष श्री चंद्रहास चंद्राकर के उदीम ले अब हमर प्रदेश साग-भाजी (सब्जी) उत्पादन के क्षेत्र म सरलग आघू बढ़त हे। आप ल बता देवन के पहिली जिहां किसान मन सिरिफ धान के खेती के भरोसा रहत रिहिन, उहें अब साग-भाजी के खेती डहर उंकर रूचि बाढ़त हे।
ए सब संभव हो पावत हे राज्य अउ केंद्र सरकार के अलग-अलग योजना ले, जेकर तहत किसान मन ल उन्नत बीज अउ छत्तीसगढ़ राज्य बीज एवं कृषि विकास निगम के ‘चैम्पस’ (CHAMPS) ऑनलाइन पोर्टल के माध्यम ले प्रधानमंत्री कृषि सिंचाई ‘ड्रिप इरिगेशन सिस्टम’ उपलब्ध कराए जावत हे। एकर से साग-भाजी के खेती म बढ़ोतरी त होतेच हे, संग म किसान मन आर्थिक रूप ले मजबूत घलो होवत हें।
ड्रिप सिस्टम: एक बूंद ले जादा फसल
ड्रिप सिस्टम जेन “पर ड्रॉप मोर क्रॉप” (Per Drop More Crop) मने हर बूंद म जादा फसल के सिद्धांत उपर आधारित हे, एकर माध्यम ले पौधा ल जरूरी पानी अउ पौष्टिक तत्व सीधा जड़ म मिलथे। एकर से पानी अउ खाद के बरबादी नइ होवय। संगे संग, निंदाई-गुड़ाई म मजूरी खर्चा कम होय ले किसान मन के लागत कम होथे अउ मुनाफा बाढ़थे।
अनुदान अउ आंकड़ा
वो ह बताइस के राज्य बीज निगम कोति ले किसान मन ल अधिकतम 55 प्रतिशत के सरकारी अनुदान (छूट) म ड्रिप अउ स्प्रिंकलर देहे जात हे। अभी रबी सीजन म दलहन/तिलहन जइसे चना फसल बर किसान मन स्प्रिंकलर पद्धति ले सिंचाई के भरपूर लाभ लेवत हें। साल 2025-26 म कुल 17,881 किसान मन ल (ड्रिप 3281 अउ स्प्रिंकलर 14,600) प्रधानमंत्री कृषि सिंचाई योजना के तहत अनुदान म सिस्टम देके आर्थिक रूप ले सशक्त करे म सहयोग करे गे हे, जेन वित्तीय वर्ष के आखिर तक चलत रइही।
शाकम्भरी योजना: 75% छूट म पम्प
निगम के माध्यम ले किसान मन खरीफ अउ रबी सीजन बर उन्नत किसम के बीजहा त लेतेच हें, संगे म चैम्पस ऑनलाइन पोर्टल के माध्यम ले ‘शाकम्भरी योजना’ के अंतर्गत अपन मनपसंद सिंचाई पम्प के घलो लाभ लेवत हें। शाकम्भरी योजना म किसान मन ल अधिकतम 75 प्रतिशत अनुदान म उंकर मांग के हिसाब ले मेक/मॉडल/ब्रांड के सिंचाई पम्प उपलब्ध कराए जाथे।
खास बात ए हे के जे किसान मन के खेत म बिजली के व्यवस्था नइ हे, उंकर बर डीजल पम्प चुने के विकल्प घलो हे। सिंचाई पम्प म मोनोब्लॉक/विद्युत पम्प/पेट्रोल/डीजल पम्प/ओपनवेल सबमर्सिबल पम्प 75 प्रतिशत अनुदान म किसान मन बर उपलब्ध हे।
बीज निगम कोति ले अभी वर्तमान म ए बछर 3234 किसान मन ल सरकारी अनुदान म लाभान्वित करे गे हे। वित्तीय वर्ष के खतम होवत ले लक्ष्य के हिसाब ले अउ जादा ले जादा किसान मन ल ए योजना के लाभ दे जाही।