- राज्य म एथेनॉल निर्माण संबंधी 508 करोड़ के चार प्रस्ताव उपर एमओयू
- छत्तीसगढ़ म पहली पइत स्थापित होवत हे एथेनॉल निर्माण के इकाई
- चारों इकाई मन म 117500 किलोलीटर एथेनॉल निर्माण के वार्षिक लक्ष्य
रायपुर, 08 सितमबर 2020। मुख्यमंत्री श्री भूपेश बघेल ह कहे हें के छत्तीसगढ़ राज्य के पूरा देश म खाद्य प्रसंस्करण के क्षेत्र म घलोक नवा पहिचान बनही। मुख्यमंत्री श्री बघेल के उपस्थिति म काली ऊंखर निवास कार्यालय म छत्तीसगढ़ म एथेनॉल निर्माण संबंधी 507 करोड़ 82 लाख रूपिया के चार प्रस्ताव मन उपर एमओयू संपन्न होइस। ए इकाई मन के वार्षिक उत्पादन क्षमता एक लाख 17 हजार 500 किलोलीटर एथेनॉल निर्माण के हे, जेखर बर करीबन 3 लाख 50 हजार टन धान के जरूरत होही। चारों इकाई मन म 583 मनखे ल रोजगार मिलही। ए इकाई मन म ले दू इकाई मुंगेली अऊ एक-एक इकाई जांजगीर-चांपा अऊ महासमुंद म स्थापित होही। ए एमओयू म राज्य शासन कोति ले उद्योग विभाग के प्रमुख सचिव श्री मनोज पिंगुआ अऊ संबंधित एथेनॉल निर्माण इकाई के उद्योगपति मन हस्ताक्षर करिन।
ये बेरा म महिला अऊ बाल विकास मंत्री श्रीमती अनिला भेंड़िया, संसदीय सविच श्रीमती रश्मि आशीष सिंह, राज्य महिला आयोग के अघ्यक्ष श्रीमती किरणमयी नायक, अपर मुख्य सचिव श्री सुब्रत साहू, अपर मुख्य सचिव डॉ. आलोक शुक्ला, सचिव डॉ. एम.गीता, सचिव श्री आर. प्रसन्ना, श्री नीलेश क्षीरसागर संग आन वरिष्ठ प्रशासनिक अधिकारी उपस्थित रहिन।