रायगढ़, हमला अंगरेजी के ज्ञान होना चाही, ये आगू बढ़े बर बहुत जरूरी हे फेर अच्छा इंसान बने रहे बर अपन जड़ ले जुड़ना घलोक बहुत जरूरी हे अऊ एखर बर हमला स्थानीय भाखा के ज्ञान जरूरी हे। हमर स्थानीय भाखा हमला अपन परिवेश के समझ देवाथे, परंपरा ले आए ज्ञान सिखाथे। नइ तो अतका अकन पीढ़ि मन के जेन ज्ञान छत्तीसगढ़ी भाखा म हे ,ओला भुला जाबोन, छत्तीसगढ़ी नइ समझ पाबोन त कतका बड़ नुकसान हो जाही। इही पाए के स्कूल मन म खूब अंगरेजी पढ़व फेर छत्तीसगढ़ी के उपेक्षा नइ होनी चाही, ये वोतकेच जरूरी हे। मुख्यमंत्री ह ये बात आज चपले म भेंट मुलाकात कार्यक्रम म छात्रा वंशिका ले कहिन।
होइस ये के भेंट मुलाकात कार्यक्रम म स्वामी आत्मानंद स्कूल के छात्रा वंशिका पाल ह मुख्यमंत्री ले बातचीत करिन। वंशिका के सवाल मन के जवाब मुख्यमंत्री छत्तीसगढ़ी म देना चाहत रहिन। फेर वंशिका ह कहिस कि “आई डोन्ट अंडरस्टैंड छत्तीसगढ़ी” । फेर मुख्यमंत्री ह हिंदी म बातचीत करिन त अंगरेजी म जवाब देवत वंशिका ह बताइस कि ओखर मां गृहिणी हे अऊ पिता पेंटर। संगेच ये घलोक बताइस कि स्वामी आत्मानंद इंग्लिश मीडियम स्कूल एक अच्छा स्कूल हे। इहां के टीचर बहुत अच्छा हे। मैं डाक्टर बनना चाहत हंव। मुख्यमंत्री ह शाबासी दीन। संगेच चर्चा म ये घलोक कहिन कि अपन जड़ ले जुड़े रहना जरूरी हे एकरे सेती सबो स्कूल म एक दिन छत्तीसगढ़ी म घलोक पढ़ाए जात हे। अपन भाखा ले जुड़े ले अपन धरती ले प्रेम बाढ़थे। अपन परिवेश के प्रति समझ बाढ़थे। ते पाए के छत्तीसगढ़ के संस्कृति ल सहेजे रखे बर हमला छत्तीसगढ़ी भाखा ल अपनाना होही।