आगामी शिक्षा सत्र ले खरोरा म स्वामी आत्मानंद उत्कृष्ट अंगरेजी विद्यालय खुलही
मोहरेंगा-कठिया अऊ कोदवा-मढ़ी सड़क निर्माण के होइस घोषणा
खरोरा म मुख्यमंत्री श्री बघेल ह कॉलेज भवन के करिन लोकार्पण
दानवीर दाऊ स्व. श्री रामप्रसाद देवांगन के प्रतिमा के करिन अनावरण
रायपुर, मुख्यमंत्री श्री भूपेश बघेल ह आज रायपुर जिला के खरोरा म बने कॉलेज भवन के लोकार्पण अऊ दानवीर स्व. दाऊ रामप्रसाद देवांगन के प्रतिमा के अनावरण करिन। ये बेरा म आयोजित सभा ल संबोधित करत उमन कहिन कि दानवीर श्री देवांगन ह लइका मन के भविष्य उज्जवल करे बर अपन जीवनकाल म ही स्कूल बर 4 एकड़ जमीन दान करे रहिन। शिक्षा के माध्यम ले ना केवल मनखे के विकास होथे भलुक परिवार अऊ समाज सुदृढ़ अऊ विकसित घलोक होथे। उमन शिक्षा के अलख जगाए म स्व. दाऊ रामप्रसाद देवांगन के महती सोच अऊ भूमिका के तारीफ करिन। खरोरा म नवा कॉलेज भवन बन जाय ले लइका मन ल अब उच्च शिक्षा बर आन जगा जाय के जरूरत नइ होही।
ये बेरा म कृषि अऊ पंचायत मंत्री श्री रविन्द्र चौबे, श्रम मंत्री श्री शिवकुमार डहरिया, धरसीवां विधायक श्रीमति अनिता योगेन्द्र शर्मा, गौसेवा आयोग के अध्यक्ष महंत श्री रामसुंदर दास, छत्तीसगढ़ खनिज विकास निगम के अध्यक्ष श्री गिरीश देवांगन, राज्य महिला आयोग के अध्यक्ष डॉ. किरणमयी नायक, जिला पंचायत अध्यक्ष श्रीमति डोमेश्वरी वर्मा अऊ क्षेत्र के जनप्रतिनिधीगण, अधिकारी-कर्मचारी संग बड़ संख्या म नागरिकगण उपस्थित रहिन।
मुख्यमंत्री श्री बघेल ह कहिन कि सरकार किसान, मजदुर, महिला सबो बर योजना क्रियान्वित करत हे। आज किसान मन के ऋण माफी के संगें-संग बिजली बिल हाफ योजना, किसान मन ल तीन अऊ पांच हॉर्सपावर मोटर म बिजली बिल छूट, राजीव गांधी किसान न्याय योजना के तहत प्रति एकड़ 9 हजार रूपिया, गरीब भूमिहीन मजदूर मन ल हर साल 7 हजार रूपिया के सहायता देहे जात हे। मुख्यमंत्री ह कहिन कि उकर संगें-संग लइका मन के गुणवत्तापूर्ण शिक्षा बर आत्मानंद उत्कृष्ठ अंगरेजी स्कूल खोले जात हे। एखर से आर्थिक रूप ले कमजोर परिवार के लइका मन ल अब अच्छा शिक्षा मिल सकही।
