सूरजपुर, सूरजपुर जिला के सबो विकासखण्ड मन म युवा महोत्सव 2019-20 बर क्लस्टर स्तरीय चयन प्रतियोगिता के आयेाजन करे जात हे। इही कड़ी म प्रतापपुर विकासखण्ड के गोविंदपुर, चंदौरा, प्रतापपुर, केरता, धरमपुर अऊ जरही क्लस्टर म 31 अकटूबर 2019 के दिन युवा महोत्सव के आयेाजन करे गीस। प्रभारी खेल अधिकारी शबाब हुसैन ह बताइस कि युवा महोत्सव 2019-20 बर जिला के भाग लेवइया बढ-चढ़के हिस्सा लेवत हे। इहां छत्तीसगढ के लोक संस्कृति के झलक देखे ल मिलत हे। सबो विधा के पहिली स्थान पवइया मन 7 व 8 नवंबर के दिन विकास खण्ड स्तरीय प्रतियोगिता म हिस्सा लेंहीं। प्रतापपुर विकासखण्ड के ओ क्लस्टर स्तरीय प्रतियेागिता म बॉंसुरी वादन, मृदंगम वादन, हारमोनियम वादन, लोकनृत्य, एकांकी नाटक, लोकगीत, गेडी दौड, शैला नृत्य, सुवा नृत्य, करमा नाचा के विधा म भाग लेवईया मन ह हिस्सा लीन। युवा महोत्सव के आयेाजन ये साल दू आयु वर्ग 15-40 साल अऊ 40 साल ले जादा बर करे जात हे। कई विधा म 40 साल ले जादा के कलाकार मन ह घलोक हिस्सा लेवत हें। विकासखण्ड प्रतापपुर के क्लस्टर स्तरीय चयन प्रतियोगिता म नोडल अधिकारी प्रतापपुर जनपद सीईओ मो. निजामुद्दीन, बी.ई.ओ.जनार्दन सिंह, प्रेमसिंधु मिश्रा संग विकासखण्ड के अधिकारी, कर्मचारी, खेल शिक्षक, जनप्रतिनिधि संग नगरपालिका, शिक्षा विभाग आदि के विशेष सहयोग रहिस।