दुर्ग, 22 जुलाई 2020। मुख्यमन्त्री निवास रायपुर में साहित्यकार लेखक संपादक श्री महावीर अग्रवाल के लिखे पुस्तक ‘छत्तीसगढ़ी हिंदी अंग्रेज़ी बातचीत कोश’ के विमोचन प्रदेश के यशस्वी मुख्यमंत्री श्री भूपेश बघेल ह करिन।.मुख्यमंत्री श्री बघेल ह श्री अग्रवाल ल ये पुस्तक के प्रकाशन बर शुभकामना देवत क़हिन के ये पुस्तक हमर छत्तीसगढ़ी भाखा ल अऊ समृध्द करही।
आज श्री महावीर अग्रवाल ह बताइन के पुस्तक म छत्तीसगढ़ी, हिंदी अऊ अंग्रेज़ी तीनो भाषा के व्याकरण, लोकोकत्ती, मुहावरा अऊ दैनिक जीवन म उपयोग अवइया व्यवहारिक वाक्य मन के संकलन करे गए हे। एकर उपयोग तीनो भाषा के पाठक अपन ज्ञान संवर्धन बर कर पाहीं। सबले बड़का बात ये हे के ये किताब ह हिन्दी अंग्रेजी बोलईया बर छत्तीसगढ़ी सीखे, हिंदी छत्तीसगढ़ी बोलईया बर हिन्दी अउ अंग्रेजी सीखे-बोले बर पुस्तक बहुत उपयोगी हे। उमन बताईन के ये पुस्तक बर मैं सरलग छै साल मेहनत करके एला प्रकशित कराए हंव। ये किताब एक प्रसिद्ध छत्तीसगढ़ी डिक्शनरी जइसे हे जेमा सब्बो शब्द अऊ वाक्य मन के बोलचाल छत्तीसगढ़ी, हिन्दी अऊ अंग्रेजी म सकेले गए हे।
आप मन जानतेच होहू के श्री अग्रवाल पाछू चार दशक ले छत्तीसगढ़ के लोक कला अऊ छत्तीसगढ़ के मूर्धन्य रचनाकार मन उपर सरलग पुस्तक लिखत हें। अभी तक इंकर छत्तीसगढ़ी लोक नाटय नाचा, छ्त्तीसगढ़ के लोकधर्मी पंडवानी, छत्तीसगढ़ के नक्षत्र, पंडवानी के पताका तीजन संग बहुत अकन पुस्तक मन प्रकशित होए हे। राष्ट्रीय स्तर म छत्तीसगढ के प्रसिध्द साहित्यकार मन म छायावाद के प्रवर्तक मुकुट्धर पांडेय, गजानन माधव मुक्तिबोध, रंग ऋषि हबीब तनवीर, पदुमलाल पुन्नालल बक्शी संग विनोद कुमार शुक्ल उपर उंकर संपादन म ‘सापेक्ष’ के 500-800 पेज के विशेषांक प्रकशित हो गे हे। छत्तीसगढ़ी सीखे के उदीम करईया मन बर श्री अग्रवाल के लिखे ‘छत्तीसगढ़ी हिंदी अंग्रेज़ी बातचीत कोश’ पुस्तक बहुत उपयोगी हे। मुख्य मंत्री निवास के विमोचन कार्यकम में प्रमुख रूप ले योगाचार्य मंगल दास मंगलम अउ कांग्रेस नेता अऊ समाजसेवक अय्यूब खान विशेष रूप ले उपस्थित रहिन।
अपन किताब के बारे म बतावत महावीर अग्रवाल जी ल सुनव-
