रायपुर म छत्तीसगढ़ी कलेवा तिहार 2020 के बिक्कट हे सोर: कार्यालय तको होइस सुरु

रायपुर, 25 जनवरी, 2020। तिहार के संयोजक आदेश ठाकुर के बताती दू-तीन दिन पहिली श्री दूधाधारी मठ के महामंडलेश्वर राजेश्री डॉ. महंत रामसुंदर दास जी ह छत्तीसगढ़ी कलेवा तिहार 2020 के कार्यालय के शुभारंभ करिन। ए बेरा म उमन आयोजक मनखे मन ल आयोन बर आशीर्वाद अऊ शुभकामना दीन।
जानबा हे के छत्तीसगढ़ी व्यंजन मन, विशेषकर छत्तीसगढ़ी थाली ल परिभाषित-प्रचारित करे अउर छत्तीसगढ़ी व्यंजन मन के प्रचार प्रसार बर अवईया 19 फरवरी ले रावणभाठा म पांच दिन के छत्तीसगढ़ी कलेवा तिहार 2020 के आयोजन होवइया हे। आयोजन के प्रेरक अउ मार्गदर्शक खुदे महामंडलेश्वर राजेश्री डॉ. महंत रामसुंदर दास जी ही हें। उमन छत्तीसगढ़ी खानपान के वैज्ञानिक अउ स्वास्थ्यप्रद विशेषता मन के बारे म बात करत अपन असीस म कहिन के देंह बर पुष्टिकारक छत्तीसगढ़ी व्यंजन, थाली अउ व्यंजन स्वास्थ्य के हिसाब ले घलोक बहुत लाभप्रद हे। छत्तीसगढ़ी थाली सबो होटल मन म घलोक उपलब्ध हो सकय, एखरे बर ये उदीम करे जात हे। ये उदीम सिरतोन म सहराये लइक हे।
ए मौका म प्रेस क्लब अध्यक्ष दामू अम्बाडारे, माधव यादव, यदुनंदन देवांगन, पार्षद सतनाम पनाग, महेश देवांगन, राजेश लोइया, सौरभ उपाध्याय, अभिषेक चौधरी, पंडित अरुणेश कुमार शर्मा संग बहुत अकन गणमान्य नागरिक उपस्थित होइन।