देसी टॉक कवि सम्मेलन म गजबे गदकिस मीर अली मीर के कमरा अउ खुमरी

रायपुर, राज्यपाल सुश्री अनुसुईया उइके ह काल इंडोर स्टेडियम म आयोजित देसी टॉक कवि सम्मेलन के शुभांरभ करिन। ए कार्यक्रम के अध्यक्षता मुख्यमंत्री भूपेश बघेल ह करिन। ए अवसर म राज्यपाल सुश्री उइके ह संबोधित करत कहिन कि साहित्य जगत म अइसन माने जाथे कि जहां रवि नइ पहुंच पापय, उहां कवि पहुंच जाथे। कवि अऊ ओखर कविता समाज के दर्पण होथे।

समाज म जऊन घटना घटथे या बदलाव आथे ओला वो देखथे वोला अपन कविता के माध्यम ले सबो के आगू वो ह प्रस्तुत करथे। कविता के माध्यम ले कहे गए बात सबो मनखे के दिल-दिमाग तक पहुंच जाथे अऊ मनखे ओ म आचरण करना चालू कर देथे। ए खातिर कवि मन ल चाही कि ओ मन समाज के आगू उन सबो बात अऊ बदलाव मन ल लावंय जऊन आदर्श समाज के निर्माण बर जरूरी हे।

मुख्यमंत्री श्री भूपेश बघेल ह कहिन कि छत्तीसगढ़ म कई प्रतिष्ठित कवि होइन, जेमन प्रदेश के मान बढ़ाए हें, ओ मन ल मैं नमन करत हंव। ए अवसर म स्वास्थ्य मंत्री श्री टी.एस. सिंहदेव, वन मंत्री श्री मोहम्मद अकबर, खाद्य मंत्री श्री अमरजीत भगत, रायपुर के महापौर श्री प्रमोद दुबे, पूर्व मंत्री अउ विधायक श्री सत्यनारायण शर्मा, श्री बृजमोहन अग्रवाल, श्री प्रेमप्रकाश पाण्डेय, विधायक श्री कुलदीप जुनेजा, श्री विकास उपाध्याय संग राज्यपाल के सचिव श्री सोनमणि बोरा घलोक उपस्थित रहिन। आयोजक मन ह राज्यपाल अऊ मुख्यमंत्री संग आन अतिथि मन ल चिन्‍हारी तको भेंट करिन। कवि सम्मेलन म विख्यात कवि डॉ. कुमार विश्वास ह काव्यपाठ ले समा बांधिन। संगेच पद्मश्री श्री सुरेंद्र दुबे, सर्वश्री मीर अली मीर, विनीत चौहान, रमेश मुस्कान, अंकिता सिंह, किशोर तिवारी, पद्मलोचन शर्मा अपन रचना मन के प्रस्तुति दीन।