मुख्यमंत्री ह प्रदेशवासी मन ल छत्तीसगढ़ी राजभाषा दिवस के दीन बधाई

रायपुर, मुख्यमंत्री श्री भूपेश बघेल ह प्रदेशवासी मन ल छत्तीसगढ़ी राजभाषा दिवस 28 नवम्बर के अवसर म बधाई अऊ शुभकामना देहे हें। उमन अपन बधाई सन्देश म कहिन के “छत्तीसगढ़ी भाखा हमर पुरखौती आए, ये हर हमर अभिमान हे। नवा सरकार बने के बाद ले छत्तीसगढ़ के इही अभिमान ला संजोए अउ आगू बढ़ाए बर हमन काम करत हन। छत्तीसगढ़ी भाखा ला हमन आत्म गौरव संग जोड़ के देखबो तभे वो आघू बढ़ही”।
श्री बघेल ह कहिन के छत्तीसगढ़ी भाखा हिंदी, अवधी अऊ बृज भाखा के समकालीन ये। राज्य सरकार कोति ले तीज-तिहार अऊ पारंपरिक संस्कार मन ल बढ़ावा देहे के संग पुरखौती के अमूल्य धरोहर के परिचय नवा पीढ़ी ले कराए ले छत्तीसगढ़ी भाखा के महत्व अऊ जादा बढ़ गए हे। छत्तीसगढ़ी म बोले म संकोच करइया मनखे घलोक अब छत्तीसगढ़ी म गरब से बात करथे। मुख्यमंत्री ह कहिन कि छत्तीसगढ़ी भाखा के विकास ल हमला आगू ले जाना हे, एखर खातिर छत्तीसगढ़ी ल दैनिक बोलचाल के संग साहित्य सृजन अऊ प्रचार-प्रसार के भाखा बनाए के जरूरत हे।