मुख्यमंत्री ह प्रदेश वासी मन ल दीन छत्तीसगढ़ी राजभाषा दिवस के बधाई

रायपुर, मुख्यमंत्री निवास कार्यालय म संस्कृति अउ पुरातत्व विभाग कोति ले आज छत्तीसगढ़ी राजभाषा दिवस के आयोजन करे गीस। मुख्यमंत्री श्री भूपेश बघेल ह राजभाषा दिवस के अवसर म छत्तीसगढ़ के 13 साहित्यकार मन ल छत्तीसगढ़ी भाखा के प्रति उंखर सेवा ल देखत सम्मानित करिन। कार्यक्रम म छत्तीसगढ़ी भाखा के 10 साहित्यकार मन के रचना मन के मुख्यमंत्री ह विमोचन घलोक करिन।
ये मौका म मुख्यमंत्री ह सबो ल संबोधित करत प्रदेश वासी मन ल राजभाषा दिवस के बधाई दीन। मुख्यमंत्री ह कहिन कि छत्तीसगढ़ी हमर मातृ भाखा अऊ हमर अभिमान हे जेला संवारे अऊ आगू बढ़ाए के काम छत्तीसगढ़ के अभी हाल सरकार ह सरलग करत हे। मुख्यमंत्री श्री बघेल ह कहिन कि उंखर सरकार ह अरपा पैरी के धार ल राजगीत बनाइस अऊ सरकारी स्कूल मन म छत्तीसगढ़ी भाखा म पढ़ाई लिखाई शुरू करवाईस। मुख्यमंत्री ह कहिन कि हर छत्तीसगढ़िया के जिम्मेदारी हे कि वो छत्तीसगढ़ी ल आगू बढ़ाए के काम करय। मुख्यमंत्री ह ये मौका म कहिन कि छत्तीसगढ़ शासन स्थानीय तीज त्यौहार अऊ खेल मन ल बढ़ावा देके देश दुनिया म छत्तीसगढ़ी ल पहिचान देवाए के काम करत हे।