- अर्जुन्दा बनही तहसील: अगले सत्र ले उद्यानिकी महाविद्यालय घलोक होही चालू
- नगर पालिका परिषद बालोद अऊ दल्लीराजहरा बर एक-एक करोड़ रूपिया के घोषणा
- शाला प्रवेश उत्सव म सामिल होइन मुख्यमंत्री
- नान्हें प्रतिभा मन के करिन सम्मान
रायपुर, मुख्यमंत्री श्री भूपेश बघेल आज बालोद जिला के नगर पंचायत अर्जुन्दा के शासकीय उच्चतर माध्यमिक शाला के प्रांगण म आयोजित शाला प्रवेशोत्सव अऊ प्रतिभा सम्मान समारोह म सामिल होइन। उमन स्कूल के नवप्रवेशी छात्र-छात्रा मन के तिलक लगाके, मुह मीठा कराके अऊ पाठ्य पुस्तक संग स्कूल बैग प्रदान करके उंखर स्कूल म स्वागत करिन अऊ ऊंखर उज्जवल भविष्य के शुभकामना दीन।
मुख्यमंत्री ह हाईस्कूल अऊ हायर सेकेण्डरी स्कूल के बोर्ड परीक्षा मन म उत्कृष्ट अंक पवइया छात्र-छात्रा मन अऊ राष्ट्रीय शालेय क्रीडा प्रतियोगिता म पदक प्राप्त करइया छात्र-छात्रा मन ल स्मृति चिन्ह प्रदान करके सम्मानित करिन।
मुख्यमंत्री ह गुण्डरदेही क्षेत्र के विधायक श्री कुंवर सिंह निषाद के मॉग म अर्जुन्दा ल तहसील बनाए अऊ अर्जुन्दा म अवइया सत्र ले उद्यानिकी महाविद्यालय शुरू करे के घोषणा करिन। उमन नगर पालिका परिषद बालोद अऊ दल्लीराजहरा के विकास बर एक-एक करोड़ रूपिया अऊ बालोद जिला के नगर पंचायत के विकास बर पचास-पचास लाख रूपिया के घोषणा करिन।
मुख्यमंत्री ह कहिन कि राज्य सरकार छत्तीसगढ़ के उच्च सांस्कृतिक परम्परा ल बनाए रखे बर लगातार काम करत हे। इही तारतम्य म छत्तीसगढ़ के पारम्परिक तिहार हरेली, तीजा, भक्त माता कर्मा जयंती बर राज्य म सार्वजनिक अवकाश के घोषणा करे गए हे। उमन कहिन कि स्कूल मन म छत्तीसगढ़ी भाखा संग हल्बी, सरगुजिहा, कुडूख, दंतेवाड़ा गोंडी, कांकेर गोंडी म पाठ्य सामाग्री अऊ वीडियो तियार करे हे। एखर से नान्हें लइका मन ल उंखर भाखा म शिक्षा मिले ले उंखर शिक्षा जादा स्वीकार अऊ आनंददायी बन सकही।
मुख्यमंत्री ह कहिन कि समर्थन मूल्य 2500 रूपिया म धान खरीदइया छत्तीसगढ़ देश के पहिली राज्य हे। सहकारी बैंक मन के ऋण माफी के बाद अब राष्ट्रीयकृत बैंक मन के ऋणी किसान मन के ऋण माफी के कार्यवाही शुरू हो गए हे। उमन नरवा, गरूवा, घुरवा अऊ बाड़ी योजना के महत्ता के जानकारी दीन अऊ कहिन कि एखर से ग्रामीण अर्थव्यवस्था सुदृढ़ होही।
जिला के प्रभारी मंत्री अऊ प्रदेश के स्कूल शिक्षा मंत्री, अनुसूचित जाति, जनजाति, सहकारिता मंत्री डॉ. प्रेमसाय सिंह टेकाम ह गुण्डरदेही अऊ ग्राम कांदुल म हायर सेकेण्डरी स्कूल बर नवा भवन अऊ ग्राम भण्डेरा के हाईस्कूल ल हायर सेकेण्डरी म उन्नयन करे के घोषणा करिन। लोक निर्माण अऊ पर्यटन मंत्री श्री ताम्रध्वज साहू ह पालक मन ले आग्रह करिन कि शाला जाये के उमर वाले शतप्रतिशत लइका मन ल स्कूल भेजव। शिक्षा प्राप्त करे ले कोनो लइका वंचित झन रहय।
समारोह ल गुण्डरदेही विधायक श्री कुंवर सिंह निषाद ह घलोक सम्बोधित करिन। कलेक्टर श्रीमती रानू साहू ह प्रतिवेदन प्रस्तुत करिस। ये बेरा म बालोद विधायक श्रीमती संगीता सिन्हा, नगर पंचायत अर्जुन्दा के अध्यक्ष श्री हरीश चन्द्राकर, जिला पंचायत अध्यक्ष श्री देवलाल ठाकुर, उपाध्यक्ष श्री संजय चन्द्राकर संग आन जनप्रतिनिधि, गणमान्य नागरिक, दुर्ग संभाग के कमिश्नर श्री दिलीप वासनीकर, पुलिस अधीक्षक श्री एम.एल.कोटवानी संग अड़बड़ झन छात्र-छात्रा, शिक्षक, पालक, नागरिक मौजूद रहिन।