धमतरी,11 सितंबर 2020। छत्तीसगढ महतारी ल समर्पित एक गीत ‘छईयां भुईंया’ 14 सितंबर के रिलीज होने वाला हे। ये गीत के खासियत ये हे कि ये गीत ल सात समंदर पार न्यूयार्क अमेरिका म रहने वाली छत्तीसगढ़ के मूल श्रीमती विभाश्री साहू ह अपन मातृभूमि छत्तीसगढ़ ल समर्पित कर लिखे हे। ये गीत ल नोनी गायिका ओजस्वी (आरु साहू) अपन आवाज ले सुमधुर बनावत हे। गाना ल कुलदीप सार्वा रागदीप स्टूडियो गुंडरदेही ह कम्पोज करे हे। ये गीत 14 सितंबर के यूट्यूब चैनल आरु साहू म रिलीज होही।
बता देथन कि जून महीना म छत्तीसगढ़ के नोनी ओजस्वी साहू (आरू) ल राष्ट्रीय लोक कलाकार मंच के ब्रांड एंबेसडर नियुक्त करे गे हे। आपमन ल ये जान के बड़का हैरानी होही कि छत्तीसगढ़ के ये नन्ही लोक गायिका सिर्फ 11 साल के हे, लेकिन अपन सुरीली आवाज के जादू ले लाखों श्रोता मन के दिल म राज करत हे।
ये गीत बर भोरमदेव साहित्य सृजन मंच परिवार जिला कबीरधाम ह छत्तीसगढ़ महतारी के दुनों दुलौरिन बेटी मन ल बधाई अउ शुभकामना दीन।