- मुख्यमंत्री ह द हिन्दू हडल मीट म बताईन नरवा, गरवा, घुरवा, बाड़ी के उपयोगिता
- ये योजना जलवायु बदलाव के चुनौती ले निपटे म मददगार
रायपुर, 22 फरवरी 2020। मुख्यमंत्री श्री भूपेश बघेल ह कहिन हे के छत्तीसगढ़ म धान अऊ किसान एक दूसर के पर्याय हें। ए खातिर हमन ग्रामीण अर्थव्यवस्था ल मजबूती देहे अऊ पर्यावरण ल बचाय बर नवा आर्थिक माडल लागू करे हन। ये मॉडल गांधी जी के 150 जयंती म शुरू करे गए हे। ग्रामीण क्षेत्र मन म जलवायु बदलाव के चुनौती के घलोक मुकाबला करे के संगें-संग कृषि लागत म कमी लाय म सहायक हे।
श्री बघेल आज बेंगलुरु म आयोजित द हिंदू हडल मीट 2020 कार्यक्रम ल सम्बोधित करत रहिन। उमन कृषि क्षेत्र के विकास अऊ औद्योगिक विकास के बीच बेहतर सामंजस्य स्थापित करे अऊ प्रदूषण रोके बर ग्रीन टेक्नोलॉजी के उपयोग ल प्रोत्साहन देहे के जरूरत घलोक बताईन। श्री बघेल ह कहिन कि ये मॉडल देश बर मिसाल हे। जिहां ग्रामीण क्षेत्र मन म कृषि जीवन यापन के प्रमुख जरिया हे।
मुख्यमंत्री श्री बघेल ह कहिन कि राज्य सरकार के नरवा ,गरवा ,घुरवा, बारी योजना जलवायु बदलाव के चुनौती के सामना करे के संगें-संग कृषि लागत म कमी लाय म घलोक सहायक होही। एखर से किसान मन के क्रय शक्ति बाढ़ही। उमन बताइन कि नरवा योजना के अंतर्गत प्रदेश के 30 हजार नाला मन म ले 1024 नाला मन म वाटर रिचार्जिंग के काम चालू करे गए हे। दूसर प्रदूषण के संगें-संग भूमिगत जल के असंतुलित दोहन ले घलोक धरती गरम होवत हे।